Գյումրեցի 13-ամյա Էդմոն Սիմոնյանը, որը տուժել էր հայտնի ավտովթարից և կոտրվածքով ու այրվածքներով տեղափոխվել Երևանի 3-րդ մանկական հիվանդանոց, այսօր անսպասելի հյուրեր ունեցավ ՝ Գյումրիի ֆուտբոլային պատվիրակությունը՝ ի դեմս ՀՖՖ Շիրակի մարզի ներկայացուցիչ Սենիկ Առաքելյանի:
Էդմոնը, ծանոթանալով հարևան հիվանդասենյակում գտնվող Պերճ և Մարիամ Պողիկյանների հետ, պատմել էր նրանց, որ շատ է սիրում ֆուտբոլ: Տեղեկանալով այս ամենի մասին` մեր ֆուտբոլային ներկայացուցիչները որոշեցին անակնկալ այցելություն կազմակերպել Էդմոնի համար, որը շատ ուրախացավ՝ տեսնելով հյուրերին:
Ուրախալի է, որ Էդմոնը բացարձակապես չէր ընկճվել իր հետ պատահած դեպքից և անդադար կրկնում էր. «տո ընձի ինչ է եղե, որ»: Նա խոստացավ շուտ ապաքինվել,կրկին ֆուտբոլ խաղալ և լինել հայկական ֆուտբոլի մեծ երկրպագու:
ՀՖՖ մամլո ծառայություն