Բրիտանական ապահովագրական ընկերություններին օրենսդրորեն կարգելեն փրկագին վճարել ահաբեկիչներին: Այս մասին երկուշաբթի օրը հայտարարել է Մեծ Բրիտանիայի ներքին գործերի նախարար Թերեզա Մեյը՝ գրում է BBC-ն:
Այս միջոցառումը ներառվել է ահաբեկչության դեմ պայքարի մասին օրենքի նախագծում:
Վեսթմինսթրում համարում են, որ փրկագները նպաստում են մարդկանց առևանգմանը: Ըստ բրիտանական իշխանությունների՝ ԴԱԻՇ-ի («Իրաքի և Շամի իսլամական պետություն») գրոհայինները պատանդներ են վերցնում, մասնավորապես, ֆինանսավորելու համար իրենց գործողությունները:
Չնայած Մեծ Բրիտանիայում ահաբեկչության ֆինանսավորումն արգելված է օրենքով, սակայն գոյություն ունի նաև «անորոշության» տարր՝ կապված ապահովագրական ընկերությունների՝ այն ընտանիքների կամ ընկերությունների պահանջները բավարարելու արգելման առնչությամբ, որոնք բախվել են փրկագնի պահանջի հետ: