«Մեծ Բրիտանիան հետաքրքրված է ԼՂ հակամարտության խաղաղ կարգավորմամբ նաև այն պատճառով, որ ներդրումներ ունի Ադրբեջանում»,- այսօր այս մասին Հայաստանի ամերիկյան համալսարանի Մանուգեան դահլիճում, դեսպանական դասախոսությունների շարքի շրջանակում, որը կազմակերպել է Ժան Մոնեի անվան Եվրոպագիտության ամբիոնի ղեկավար, ՀԱՀ քաղաքագիտության և միջազգային հարաբերությունների բաժնի ասիստենտ-պրոֆեսոր Սյուզաննա Վասիլյանը, ասաց ՀՀ-ում Մեծ Բրիտանիայի արտակարգ և լիազոր դեսպան Քեթրին Ջեյն Լիչը՝ անդրադառնալով օրերս ԼՂՀ ՊԲ-ի կողմից իրականացված հատուկ գործողությանը և ԼՂ հակամարտության խաղաղ կարգավորման գործում Մեծ Բրիտանիայի ջանքերին:
Նա նշեց, որ ուղղաթիռի անկման վայր հասանելիության ապահովման պահանջը Մեծ Բրիտանիան բարձրացնում էր միջազգային հանրության հետ՝ ԵԱՀԿ ՄԽ հայտարարություններին աջակցելով: Քեթրին Լիչն ասաց, որ իրականացված հատուկ գործողությունը, որի արդյունքում ուղղաթիռի անձնակազմի դիակները տարհանվեցին, գուցե փոքր-ինչ խաղաղություն տա զոհերի ընտանիքներին: Ինչ վերաբերում է Մեծ Բրիտանիայի դերակատարությանը, ապա դեսպանը հիշեցրեց, որ British Petrolium-ը Ադրբեջանի տնտեսության առանցքային ներդրողն է, Ադրբեջանում ներդրված են միջոցներ, այսինքն՝ Մեծ Բրիտանիան հետաքրքրություններ ունի Ադրբեջանում, ինչը խոսում է այն մասին, որ Մեծ Բրիտանիան հետաքրքրված է հակամարտության խաղաղ կարգավորմամբ նաև այդ ներդրումների համար:
«Կարգավորումը բոլոր կողմերի շահերից է բխում»,- ասաց դեսպանը, ապա հիշեցրեց ՄԲ ԱԳ նախարար Լիդինգթոնի՝ վերջերս տարածաշրջան կատարած այցը, որը, Քեթրին Լիչի խոսքով, ուղղված էր ԼՂ հակամարտությանը:
«Այցի հիմնական նպատակը շփման գծում օգոստոսյան լարվածությունից հետո ուղերձ փոխանցելն էր Հայաստանին և Ադրբեջանին, որ այցի խաղաղ կարգավորմանն այլընտրանք չկա, քաղաքական զիջումների շուրջ երկխոսությունը կարևոր է, անհրաժեշտ:
Վերջին տասը տարվա ընթացքում մենք արել ենք ամեն ինչ Հայաստանի և Ադրբեջանի միջև մարդկային շփումներն ապահովելու համար, քաղհասարակական ծրագրերում ենք գումարներ ներդրել, մարդկային շփումն ենք կենդանի պահել: Սա այն տարածքն է, որտեղ մենք կարող ենք աշխատել. սա է մեր մոտեցման հիմքը ներկայումս»,- ասաց Քեթրին Լիչը: