Կենտրոնական բանկի նախկին նախագահ Բագրատ Ասատրյանի խոսքով՝ Հայատանում դրամի արժեզրկումը մեծապես պայմանավորված է գլոբալ, հիմնարար պատճառներով՝ Հայաստանի տնտեսության վիճակով, մեր վճարային հաշվեկշռի ընդհանուր վիճակով, արտաքին առևտրի փոփոխվող վիճակով և այն բոլոր զարգացումներով, որ այս տարվա ընթացքում եղել են՝ ներդրումների ծավալի նվազման, մասնավոր տրանսվերտների ծավալի զգալի նվազման: «Սրանք այն գործոններն են, որոնք նպաստել են դրամի արժեզրկմանը: Բայց թե այս պրոցեսը ինչքան և ինչպես կտևի, դա կանխատեսելը լուրջ չէ»,- «Առաջին լրատվական»-ի հետ զրույցում ասաց Ասատրյանը:
Նրա խոսքով՝ դրամի արժեզրկումը ռուբլու արժեզրկման ֆոնին հավասարակշռության որոշակի տարրեր կհաղորդի, քանի նոր մենք գնում ենք դեպի ԵՏՄ, միասնական տնտեսական տարածք: «Այս իրողությանը պետք է հարմարվել, քանի որ հակառակ դեպքում կորուստներն ավելի մեծ են լինելու: Դրա համար հարկավոր է մտածված քաղաքականություն: Այն մոտեցումները, որոնք մինչ այդ Հայաստանը կիրառում էր, պետք է վերանայվեն: Այդ թվում քաղաքականության սկզբունքների մեջ նահանջի պետք է գնանք: Նահանջը հնարավորություն կտա, որ շատ մեծ կորուստներ չունենանք՚,- ասաց տնտեսագետը:
Բագրատ Ասատրյանի խոսքով՝ դրամի արժեզրկումն ի վերջո հանգեցնելու է գնաճի, «ցածր տնտեսական աճին զուգահեռ դրամի արժեզրկումը շատ վատ արդյունքների կհանգեցնի, որը մենք բոլորս կզգանք մեր մաշկի վրա»:
Ինչ վերաբերում է դրամի արժեզրկման վերաբերյալ կենտրոնական բանկի արձագանքին, թե իրենք վարում են ազատ լողացող փոխարժեքի քաղաքականություն, ապա, Ասատրյանի խոսքով, ԿԲ-ն այլընտրանք չունի, քան հետևողականորեն լողացող փոխարժեքի քաղաքականության իրականացումը: «Յուրաքանչյուր շեղում վտանգելու է Հայաստանի և Հայաստանի քաղաքացիների վիճակը: Թվացյալ ինչ-որ քայլեր կատարվում են, բայց ԿԲ-ն չպետք է գնա ճնշումների, այլ մնա իր բարձունքի վրա, հետևի իր քաղաքականությանը, այլապես կորուստներն իսկապես անդառնալի կլինեն»,- կարծում է Բագրատ Ասատրյանը:
Նրա խոսքով՝ ամենացավալին այն է, որ նման տնտեսական իրավիճակներում Հայաստանի՝ օրերս հաստատված բյուջեն ոչ մի կապ չունի այն զարգացումների, մարտահրավերների հետ, որոնք այսօր կան և կանխատեսելի էին: «Այսպես չեն արձագանքում մարտահրավերներին: Բյուջեն պետք է ավելի ագրեսիվ լիներ: Իշխանությունները պետք է գնային եկամտային բազայի ուժեղացման, ինչու չէ՝ նաև նոր հարկատեսակների ավելացման: Իշխանությունն այս իրավիճակում պետք է գնար դեֆիցիտի ավելացման: Բայց, ցավոք, ոչ մի բան չեմ տեսնում այս նոր բյուջեում, որն ուղղված կլիներ գալիք մարտահրավերներին»,- ասաց Բագրատ Ասատրյանը: