Մեծ Բրիտանիայի ամենակարևոր խնդիրն այսօր մեկն է՝ մնա՞լ ԵՄ անդամ, թե՞ ոչ: Այսօր այս մասին Հայաստանի ամերիկյան համալսարանի Մանուգեան դահլիճում, դեսպանական դասախոսությունների շարքի շրջանակում, որը կազմակերպել է Ժան Մոնեի անվան Եվրոպագիտության ամբիոնի ղեկավար, ՀԱՀ քաղաքագիտության և միջազգային հարաբերությունների բաժնի ասիստենտ-պրոֆեսոր Սյուզաննա Վասիլյանը, ասաց ՀՀ-ում Մեծ Բրիտանիայի արտակարգ և լիազոր դեսպան Քեթրին Ջեյն Լիչը՝ անդրադառնալով ԵՄ-ին, Մեծ Բրիտանիայի ներքին պահանջներին:
Նա նախ ներկաներին բացատրեց, թե ինչ է Եվրոպական միությունը և ինչպիսի բարդ կառույց է, ինչպիսի բարդությամբ են ԵՄ-ում կայացվում որոշումները: Սակայն, նրա խոսքով, դրա հետ մեկտեղ, ԵՄ-ն համակարգային կառույց է, որովհետև ԵՄ անդամ երկրները կարողանում են հաղթահարել ԵՄ-ում առկա բյուրոկրատիան և ապահովում են իրենց փոխակերպումը, կարողանում են աշխատեցնել այս կազմակերպությունը:
Նա նշեց, որ առաջինը, որ կարևոր է իմանալ ԵՄ-ի մասին, այն է, որ ԵՄ-ում առկա է հզոր բյուրոկրատիա, քսանութ երկրների կարծիքի, սոցիալ-տնտեսական, արտաքին քաղաքականությունների համաձայնեցում այդ բոլոր անդամ-երկրների միջև: Սակայն, դեսպանի համոզմամբ, այս հարցերում համաձայնեցումներն են, որ հանգեցնում են Եվրոպայի բարգավաճմանը: Նրա կարծիքով՝ կարևոր է հասկանալ նաև այն, թե ինչպես են կայացվում այդ որոշումները: Դա շնորհելու և ստանալու գործընթաց է, բոլոր երկրները գիտեն այդ մասին:
Երրորդը, որ, ըստ դեսպանի, կարևոր է, այն է, որ ԵՄ-ում չկա կոնսենսուս վերջնական ճակատագրի վերաբերյալ, տարբեր են տեսակետները:
Ինչ վերաբերում է Բրիտանիայի ներքին խնդիրներին, ապա, նրա խոսքով, ամենակարևոր դեբատը հետևյալն է՝ մնա՞լ ԵՄ-ում, թե՞ ոչ:
Քեթրին Լիչի խոսքով՝ եթե Դևիդ Քեմերոնն ընտրվի առաջիկա ընտրություններում, խոստացել է այս հարցը դնել հանրաքվեի: Դեսպանը բացատրեց, թե ինչու է Մեծ Բրիտանիայում այս հարցը բարձրացվել: Նա նշեց, որ հիմնական խնդիրն իմիգրացիան է և քաղաքականության համաձայնեցումը ԵՄ-ի հետ:
Լուսանկարը՝ Photolure-ի