Վերաքննիչ քրեական դատարանում ընթանում է Վալերիանո Դի Սիմոնեի գործով բերված վերաքննիչ բողոքի քննությունը:
Գործը քննվել է Մալաթիա-Սեբաստիա վարչական շրջանի ընդհանուր իրավասության դատարանում Կարեն Ֆարխոյանի նախագահությամբ:
43-ամյա Վալերիանոն Իտալիայի քաղաքացի է՝ իտալական Լանչանո քաղաքից: Նա 2013 թվականի հոկտեմբերից բնակվել է Դոմինիկյան Հանրապետության Վիլա Սատելիտե քաղաքում, զբաղվել է մեքենաների պահեստամասերի վաճառքով:
Ըստ դատական ակտի՝ Վալերիանո Դի Սիմոնեն 2014 թվականի հունվարին Դոմինիկյան Հանրապետությունում նախնական համաձայնության է եկել ոմն Կառլոսի հետ՝ իրացնելու նպատակով առանձնապես խոշոր չափերի թմրամիջոցներ մաքսանենգությամբ Հայաստանի Հանրապետություն փոխադրելու, Երևանում իրեն ներկայացած դոմինիկացուն թմրամիջոցներն իրացնելու, դրա դիմաց 18 հազար դոլար ստանալու վերաբերյալ:
2014 թվականի փետրվարի 22-ին Վալերիանոն Կառլոսից ստացել է նախապես ճամպրուկի գաղտնարաններում թաքցված 2936,93 գրամ կոկաինը, ավիատոմսը, Երևանի «Դելյուքս» հյուրանոցում իր անվամբ սենյակի ամրագրման փաստաթուղթը:
Փետրվարի 23-ին նա Դոմինիկանա-Մոսկվա-Երևան չվերթով ժամանել է Երևանի «Զվարթնոց» օդանավակայան: Մաքսային հսկողությունից թաքցնելով՝ ՀՀ է տեղափոխել կոկաինը, որի 1941, 25 գրամը հայտնաբերվել է Զվարթնոցի մաքսատան աշխատակիցների կողմից՝ ուղեբեռի զննության ժամանակ՝ ճամպրուկի հետնապատի ու պաստառի միջև տեղակայված գաղտնարանում, իսկ 995,68 գրամը՝ նույն ճամպրուկում գտնվող համակարգչի պայուսակի միջնապատի գաղտնարանում:
Վալերիանո Դի Սիմոնեն հայտնել է, թե 2013 թվականի հուլիսի 27-ից մինչև օգոստոսի 13-ը զբոսաշրջային նպատակով եղել է Դոմինիկյան Հանրապետությունում: Այնտեղ ծանոթացել է Շարլին Մարտինեսի հետ, մտերմացել են:
2013 թվականի հոկտեմբերի 23-ին կրկին մեկնել է Դոմինիկյան Հանրապետություն՝ Շարլինի հետ ապրելու: Ծանոթացել է Շարլինի հոր՝ Ռադամելի հետ, միասին զբաղվել են մեքենաների պահեստամասերի վաճառքով:
2014 թվականի հունվարին պատահականորեն ծանոթացել է Կառլոս անունով 35-40 տարեկան անձնավորության հետ: Նա առաջարկել է Հայաստան տեղափոխել կոկաին, որի դիմաց կստանա 18 հազար դոլար: Որոշ ժամանակ մտածել ու համաձայնել է այդ առաջարկին, որովհետև իրեն գումար էր պետք՝ լյարդի փոխպատվաստում կատարելու համար:
Թռիչքից մոտ երեք ժամ առաջ Կառլոսն իրեն է տվել ճամպրուկը, որում թաքցված է եղել կոկաինը:
Կառլոսը տրամադրել է նաև Երևան-Վիեննա-Միլան ավիատոմս, որպեսզի «գործն ավարտելով»՝ Վալերիանոն Երևանից հեռանա: Նա զգուշացրել է, որ Դոմինիկանայի օդանավակայանում հետևող մարդիկ կան, որպեսզի Վալերիանոն հանկարծ ճամպրուկը չթողնի ու չփախչի:
Երևանում պետք է հյուրանոց ուղևորվեր տաքսիով: Հյուրանոցից պիտի զանգեր ու ասեր, որ տեղավորվել է: Երկու-երեք օր անց հյուրանոց պիտի գար մի դոմինիկացի: Վալերիանոն պետք է նրան հանձներ թմրամիջոցներով ճամպրուկը և ստանար 18 հազար դոլարը: Կառլոսն ասել էր, թե դոմինիկացին թմրամիջոցը Հայաստանից պետք է տեղափոխի Թուրքիա:
Սակայն Վալերիանոն Երևանում հյուրանոց չի էլ հասել. հենց օդանավակայանում մաքսային զննության ժամանակ ճամպրուկի գաղտնարաններում հայտնաբերվել է թաքցված կոկաինը: Ճամպրուկում եղած համակարգչի պայուսակի մասին, ըստ Վալերիանոյի, ինքն անտեղյակ է եղել: Այդ պայուսակում ևս կոկաին է հայտնաբերվել:
Վալերիանոն կատարած հանցավոր արարքը բացատրել է նրանով, որ իր առողջական խնդիրները լուծելու համար գումարի կարիք է ունեցել: Վալերիանո Դի Սիմոնեն, ըստ դատական ակտի, վատառողջ է, տառապում է «Հեպատիտ C» և թունավոր խպիպ հիվանդություններով:
Ընդհանուր իրավասության դատարանը Վալերիանո Դի Սիմոնեին մեղավոր է ճանաչել և վերջին հաշվով դատապարտել է 12 տարի ազատազրկման:
Դատավճռի դեմ վերաքննիչ բողոք են բերել իտալացի ամբաստանյալն ու նրա շահերի հայ պաշտպանը և միջնորդել են մեղմացնել պատիժը:
Վերաքննիչ դատարանում Վալերիանո Դի Սիմոնեն հրաժարվեց իր նախկին պաշտպանից՝ ասելով, թե դժգոհ է նրա աշխատանքից: Հայտնեց, թե ցանկանում է նոր պաշտպան ունենալ: Նույնիսկ փաստաբանի անուն-ազգանուն ներկայացրեց, ում ծառայություններից օգտվելու խորհուրդ էին տվել կալանավայրում:
Վալերիանոն ասաց, թե չի հասկանում՝ ինչ պայմանագիր պիտի կնքի նոր փաստաբանի հետ, բայց եթե խոսքը վերաբերում է փաստաբանին վճարելուն, ապա հարազատներն Իտալիայից դրա համար գումար կուղարկեն:
Վալերիանոյի մատնանշած փաստաբանը վերաքննիչ դատարան չէր ներկայացել, չնայած ըստ Վալերիանոյի՝ ինքը նրա հետ խոսել էր հեռախոսով ու տեղեկացրել էր դատական նիստի մասին:
Վերաքննիչ դատարանը նիստը հետաձգեց: Հաջորդ դատական նիստին կլուծվի ամբաստանյալի նոր պաշտպանին ներգրավելու հարցը, եթե ամբաստանյալը մինչև այդ նիստը՝ նոյեմբերի 18-ը, մտադրությունը չփոխի: