Հայտնի է, որ վերջին շրանում Հայաստանում կտրուկ թանկացել է խոզի միսը: 1 կիլոգրամը 2800-3000 դրամից հասել է մինչև 4200 դրամի: Այս փաստն ընդամենը արձանագրվեց, սակայն պատկան մարմինները որևէ բացատրություն չտվեցին, թե որն էր այդ կտրուկ գնաճի պատճառը:
«Առաջին լրատվական»-ը տեղեկություններ ստացավ, որ այդ թանկացումից առաջ Հայաստանի խոշոր խոզաբուծական ֆերմաներից մեկում կտրուկ անկում է տեղի ունեցել: Դա «Վասանավի» ընկերությունն է, որը պատկանում է «Բարգավաճ Հայաստան» կուսակցության պատգամավոր Վահան Կարապետյանին: Ընդ որում՝ պատգամավորը ևս մեկ խոզաբուծական ֆերմայում սեփականատեր է արդեն Հանրապետական կուսակցության գործարար պատգամավոր Սամվել Ալեքսանյանի հետ: Եվ, մեր տեղեկություններով, այս ընկերություններում խոզի ամբողջ գլխաքանակի անկում է տեղի ունեցել: Ընդ որում՝ մոտ 25.000 խոզ է սատկել միայն «Վասանավի» ընկերությունում:
Վ.Կարապետյանը մեզ հետ զրույցում հաստատեց, որ իր սեփականությունը հանդիսացող ընկերությունում նման անկում է գրանցվել, և այսօրվա դրությամբ ոչ մի կենդանի չի մնացել: Պատգամավորը չցանկացավ խոսել այդ անկման պատճառների մասին, բայց, ամենայն հավանականությամբ, պատճառը ինչ-որ հիվանդություն է եղել: Եվ հետաքրքիր է, որ այդ հիվանդությունը գրանցվել է միայն Վ.Կարապետյանին պատկանող ընկերությունում, ու ոչնչացրել է կենդանիների ամբողջ գլխաքանակը: Հայաստանի որևէ այլ խոզաբուծական խոշոր կամ փոքր ընկերությունում նման դեպք կարծես թե չի հիշատակվում: Եվ մեր աղբյուրները չբացառեցին անգամ, որ այդ անկումը բոլորովին էլ պատահական չի եղել, հակառակ պարագայում այն կարող էր նկատվել նաև այլ գործարարների պատկանող խոզաբուծական ֆերմայում կամ գյուղացիական տնտեսություններում:
Մենք փորձեցինք գԳյուղատնտեսության նախարարությունից էլ մեկնաբանություն ստանալ, թե ինչն է եղել վերջին շրջանում խոզի մսի նման կտրուկ թանկացման պատճառը, և այդ թանկացման վրա ազդե՞լ է «Վասանավի» ընկերությունում տեղի ունեցած անկումը: Փորձեցինք նաև ճշտել, թե որն է եղել այդ անկման պատճառը, պատկան մարմիններն արդյոք ուսումնասիրե՞լ են այդ փաստը, գտե՞լ են պատճառները: Եվ գուցե այդ առումով պատասխանատուներ է՞լ կան, չէ՞ որ դա վերաբերում է սննդի անվտանգության խնդրին:
Նախարարությունից դեռ որևէ պատասխան չենք ստացել: Մեզ գրեթե չպատասխանեցին նաև սննդամթերքի անվտանգության պետական ծառայությունից:
Վ.Կարապետյանը նույնպես չցանկացավ խոսել այդ թեմայով, նա անգամ չցանկացավ նշել, թե որքան գումարի վնաս է կրել այդ անկման պատջառով, բայց նշեց, որ խոսքը վերաբերում է միլիոնավոր դոլարների: Նա դեռևս չի որոշել, թե արդյոք կվերականգնի՞ այդ ֆիրման և նորից կսկսի՞ խոզեր բուծել:
Երևույթի հետ կապված՝ չկարողացանք մեկնաբանություն ստանալ նաև Սամվել Ալեքսանյանից, իսկ ԲՀԿ-ական պատգամավորը չցանկացավ նաև ասել, թե իր սեփականությունը հանդիսացող ֆերմայի խոզերի գլխաքանակը Հայաստանի խոզաբուծական ոլորտում որքան տոկոս էր կազմում, որ այդպիսի ազդեցություն է ունեցել մսի թանկացման վրա: Վ.Կարապետյանը հաստատում էր միայն մեր ունեցած տեղեկությունները՝ չցանկանալով հավելյալ որևէ տեղեկություն հաղորդել:
Իսկ մեր տեղեկություններով՝ պատգամավորը խնդիրներ ունի նաև մաքսային ծառայության հետ: Բանն այն է, որ «Վասանավի» ընկերությունում բաժնետեր է նաև հոլանդական մի ընկերություն: Եվ Հոլանդիայի կառավարությունը բարեգործական ծրագրով այդ ընկերությանը խոզաբուծության համար նոր հոսքագիծ էր նվիրել, իսկ մաքսային ծառայությունները դրա համար մաքսատուրք են պահանջում, որն այդ երկիրը չի ցանկանում վճարել: Ընդ որում՝ Հոլանդիան մեր տարածաշրջանում բարեգործական նման 32 թե 33 ծրագիր էր նախատեսել, որոնք պետք է հավասարապես բաշխվեին Հայաստանի, Վրաստանի և Ադրբեջանի միջև:
Ծրագիրը նմանատիպ օգնություն էր նախատեսել ձկնաբուծական, ջերմոցային ոլորտի, սնկի աճեցման և գյուղատնտեսական այլ ոլորտների համար: Հայաստանին բաժին հասնող ծրագրերից առաջինը բաժին է հասել «Վասանավի» ընկերությանը և ունեցել է նման տխուր ավարտ: Ընդ որում՝ դա եղել է Հոլանդիայի նման բարեգործական 576-րդ ծրագիրը: Հայկական կողմն այդ հոսքագիծը հետ է ուղարկել Ամստերդամ, բաժանել է տվել 17 մասի և պահանջել է մաքսազերծել: Հոլանդական կողմը, սակայն, հրաժարվել է բարեգործություն կատարելով՝ նաև մաքսատուրք վճարել: Եվ Հայաստանի հետ այդ բարեգործական ծրագրի առաջին իսկ անհաջող փորձից հետո Հոլանդիան մեր երկրի համար նախատեսած բարեգործական մյուս ծրագրերը բաժանել է Ադրբեջանի ու Վրաստանի միջև: