ԱԺ ՀՀԿ խմբակցության պատգամավոր Սամվել Ֆարմանյանն «Առաջին լրատվական»-ի հետ զրույցում անդրադարձավ ոչ իշխանական եռյակի՝ Ընտրական օրենսգրքում բարեփոխումներ կատարելու, մեծամասնական ընտրակարգից հարյուր տոկոսով համամասնական ընտրակարգի անցնելու պահանջին:
Ըստ նրա՝ մեծամասնական և համամասնական ընտրակարգի խնդիրը շատ երկար քննարկման առարկա պետք է դառնա:
«Խորհրդարանական քննարկումների ժամանակ ես ասել եմ, որ, ինչ-որ առումով, խնդիրն արհեստական է, որովհետև մեր քաղաքական մշակույթի և համակարգի խնդիրները պայմանավորված չեն ընտրակարգով: Կարող է լինել մեծամասնական ընտրակարգով ազնիվ ճանապարհով ընտրված պատգամավորը ու շատ որակյալ ծառայություններ մատուցի երկրին օրենսդրական աշխատանքով, և հակառակը՝ համամասնական ընտրակարգով ընտրված պատգամավոր, որը հինգ գումարումների ԱԺ-ում մեկ անգամ ԱԺ ամբիոնին մոտեցած չլինի»:
Նրա խոսքերով՝ սա հարց է, որի ուղղությամբ հարկավոր է իսկապես բաց քննարկում, բայց «ասես ավետարանիչների կողմից որպես ճշմարտություն ներկայացված, թե սա ենթակա է ընդունման՝ սա սխալ մոտեցում է»:
Փոխարենը նա այլընտրանքային տարբերակ առաջարկեց. «Թող դրա փոխարեն Հայաստանի առանցքային ուժերի առաջնորդները հավաքվեն և բոլորով, որպես տղամարդիկ, կանգնեն ու թուղթ ստորագրեն, թե մեծամասնական և համամասնական ընտրակարգով ի՞նչ թեկնածուներ են առաջադրելու, և պահեն խոստումը, այլապես ինչ էական է՝ մեծամասնականո՞վ անպիտան կընտրվի, թե՞ համամասնականով»:
Ավելին՝ տեսանյութում: