Օրերս Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում, դատավոր Արթուր Մկրտչյանի նախագահությամբ, շարունակվեց 18-ամյա նորակոչիկ Նորայր Սահակյանի՝ 2012-ին տեղի ունեցած մահվան գործով դատավարությունը:
Նորայրի ծնողների պահանջը մեկն է՝ արդար դատավարություն և մեղավորներին պատիժ: Նրանք վստահ են, որ համապատասխան բուժօգնություն ցուցաբերելու դեպքում Նորայրը հաստատ հիմա ողջ և առողջ իրենց կողքին կլիներ:
Հիշեցնենք, որ 2012 թ. դեկտեմբերի 21-ին Նորայրին, առանց որևէ առողջական խնդրի, Էրեբունու զինկոմիսարիատից զորակոչել են բանակ: Կենտրոնական հավաքակայանում վեց ներարկումներից հետո նրա ջերմությունը բարձրացել էր մինչև 38.3 աստիճան: Նորայրը մոտեցել էր հերթապահ բժշկին՝ հոսպիտալի բժիշկ Կարեն Ջուլհակյանին, որը գինեկոլոգ է, և ասել, որ ջերմություն ունի: Նորայրին մեկ հաբ տալով՝ ուղարկել էին Ղարաբաղ: Ճանապարհին Նորայրը դարձյալ վատ է զգացել, փսխել է, բայց նրան օգնություն չեն ցուցաբերել: Բանակում Նորայրին կարողացել են պահել 48 ժամ: Այս մասին «Առաջին լրատվական»-ին պատմել են ծնողները:
Ստեփանակերտի զինվորական հոսպիտալի թերապևտիկ բաժանմունքի պետ Էդուարդ Արզումանյանը, որը որպես վկա կանչվել է դատարան, ասաց, որ պատվաստումից հետո երբ իմացել են Նորայրի ջերմելու մասին, անմիջապես զննել են նրան, ջերմիջեցնող տվել և ուղարկել հոսպիտալ:
Իվանյանի անվան հոսպիտալի բուժքույր Անահիտ Գրիգորյանը դատարանում հայտնեց, որ ինքը ջերմիջեցնող է տվել Նորայրին, ապա կաթիլային միացրել: Ու թեև, նրա պնդմամբ, Նորայրի ջերմությունն իջել է, սակայն կեսգիշերին, երբ Նորայրին արթնացրել է դեղորայք տալու համար, նորակոչիկն ասել է, թե սրտխառնոց ունի: Ճնշումը չափելուց հետո նորակոչիկին տեղափոխել են վերակենդանանցման բաժանմունք:
Հայրը «Առաջին լրատվական»-ի հետ զրույցում նշեց, որ մինչև հիմա դատարանում ցուցմունք տված բոլոր բժիշկները միմյանց ճանաչում են, դրա համար դատական այս փուլում որևէ ակնակալիք չունի: Հայրն ավելի շատ հույսը կապում է փորձագետների դատարան ներկայանալու հետ:
«Դուք պատկերացնում եք, որ բժիշկն ասում է՝ ես երեխուն ընդունել եմ 39,7 տաքությամբ, չափել եմ, գրել եմ միանգամից հոսպիտալ: Ես բժշկին հարցնում եմ՝ երեխան 39,7 ջերմություն է ունեցել, ինչո՞ւ էինք ուղարկում Իվանյանի հոսպիտալ, ուղարկեիք Երևան, ինձ ասում է՝ ես գտա, որ պետք չէ»,- վրդովված նշեց Նորայրի հայրը՝ Նվեր Սահակյանը՝ վստահ լինելով, որ եթե որդուն Երևան տեղափոխեին, հիմա նա ողջ կլիներ:
Նրան վրդովել է բուժքրոջ ցուցմունքը, որն ասում է, թե բժշիկներն ինչ նշանակում արել են, տվել է, կաթիլային է միացել. «Ստում է, նա միայն ջերմիջեցնող է տվել: Մենք այդ ընթացքում խոսել ենք Նորոյի հետ: Ես բուժքրոջը հիշեցրի՝ երբ մենք նախարարության շենքում հանդիպեցինք, դուք ասացիք՝ հեղուկ եք միացրել, ասացիք՝ չեք հիշում՝ ինչ հեղուկ: Էս ոնց է, որ երկու տարի անցել է՝ հատիկ -հատիկ տալիս եք, թե ինչ դեղ եք ներարկել»:
Նա նշեց, որ բուժքույրը նույնպես, ինչպես նախկին վկաները, պատրաստված էին եկել, թե ինչ են խոսելու:
«Կարևորը փորձագետների խոսքն է լինելու, ոչ այնքան վկաների, քանի որ փորձագետների ասածի հիման վրա են մեղադրանքներ ներկայացվել: Սպասում ենք նրանց անաչառությանը»,- հույս հայտնեց Նվեր Սահակյանը:
Հիշեցնենք, որ հարուցվել է քրեական գործ՝ Քրեական օրենսգրքի 376-րդ հոդվածի 2-րդ մասի հատկանիշներով (անփույթ վերաբերմունք ծառայության նկատմամբ, որն անզգուշությամբ առաջացրել է ծանր հետևանքներ), ինչը նախատեսում է 3-6 տարվա ազատազրկում: Քրեական գործ է հարուցվել Կարեն Ջուլհակյանի (հերթապահ մայոր, հավաքակայանի պատասխանատու), ուղեկցող ենթասպա Վարուժան Մանասյանի, հերթապահ բժիշկ Արկադի Չախոյանի, Իվանյանի ինֆեկցիոն բաժանմունքի պետ Մհեր Դավիդյանցի նկատմամբ (314-րդ հոդվածով և 376-րդ հոդվածի 2-րդ մասով):
Հաջորդ դատական նիստը տեղի կունենա դեկտեմբերի 9-ին: