Իրանի միջուկային ծրագրի շուրջ բանակցություններում հիմնական տարաձայնությունները պահպանվում են, սակայն արդեն ձեռք բերված արդյունքները որոշակի լավատեսության հիմք են: Այս մասին ԱՄՆ նախագահ Բարաք Օբաման հայտարարել է նոյեմբերի 23-ին ABC հեռուստաալիքին տված հարցազրույցում, գրում է TASS-ը:
«Լավ նորությունն այն է, որ նախնական պայմանավորվածությունը, որին մենք հասել ենք, իրոք հանգեցել է Իրանի միջուկային ծրագրի զարգացման դադարեցմանը: Որոշ դեպքերում նույնիսկ հետ քայլեր են արվել, մասնավորապես, երբ խոսքը ուրանի հարստացման և պահուստներ ունենալու մասին է»,- ասել է երկրի ղեկավարը: Նրա խոսքով՝ «այդ ուղղությամբ հաջողության են հասել, և Իրանը պահպանում է պայմանավորվածության պայմանները»: «Այժմ խնդիրն այն է՝ արդյոք կկարողանա՞նք մշտական պայմանավորվածություն ձեռք բերել: Եվ դեռ բավականին տարաձայնություններ կան»,- ավելացրել է Օբաման:
Նախագահը նշել է, որ ԱՄՆ-ի խնդիրը այս բանակցություններում համաձայնագրի կնքումն է, որի համաձայն Թեհրանը մի շարք ուղղություններով ամբողջությամբ կդադարեցնի իր միջուկային ծրագիրը, որը նրան հնարավորություն է տալիս միջուկային զենք ստանալ: Փոխարենը, պայմանների կատարման դեպքում, այս պետության նկատմամբ գործող պատժամիջոցների ռեժիմը կթուլացվի: «Կարծում եմ, որ Իրանը կցանկանար, որ այդ պատժամիջոցները անմիջապես դադարեն գործել, սակայն որպեսզի որոշ ուղղություններով ամբողջովին չփակվի (միջուկային ծրագրի իրականացումը): Մենք չենք կարող դրան գնալ»,- ասել է Օբաման:
Այսպիսով, նախագահի խոսքով, լավ նորությունն այն է, որ բանակցությունները շարունակվում են, և «պահպանվում է միջազգային կոալիցիան, որի առկայությունը ապահովել է պատժամիջոցների այսպիսի արդյունավետությունը»: Այս համատեքստում նախագահը հիշեցրել է 5+1 (ՄԱԿ-ի ԱԽ-ի մշտական անդամների և Գերմանիայի) խմբի աշխատանքները, և, մասնավորապես, Իրանի միջուկային ծրագրի շուրջ Ռուսաստանի և Չինաստանի հետ համագործակցությունը, որի ժամանակ «հաճախ լարվածություններ են առաջանում»: «Վերջին շրջանում մենք լուրջ լարվածություն ունենք Ռուսաստանի հետ: Ամեն դեպքում, նրանք խոստովանել են, որ մեր դիրքորոշումը (Իրանի միջուկային ծրագրի վերաբերյալ) արդարացի է»,- նշել է Օբաման: «Խնդիրն այն է՝ արդյոք Իրանը կկարողանա՞ «այո» ասել: Նրանք կոշտ դիրքորոշման կողմնակիցներ ունեն»,-հավելել է նախագահը:
