Կոտայքի մարզի ընդհանուր իրավասության դատարանում Մխիթար Պապոյանի նախագահությամբ ընթանում է Արմեն Բարսեղյանի գործի դատական քննությունը:
Ըստ մեղադրանքի՝ 2013 թվականի դեկտեմբերի 28-ին, ժամը 21-ի սահմաններում Կոտայքի մարզի Ջրվեժ գյուղում գտնվող «Թագավորանիստ» հյուրանոցային համալիրի 4-րդ սենյակում 49-ամյա Արմեն Բարսեղյանը փորձել է սեքսուալ բնույթի բռնի գործողություններ կատարել Երևանի բնակչուհի Մ. Բ.-ի նկատմամբ:
Բարսեղյանը բռնել է Մ. Բ.-ի մազերից, փորձել է հարկադրել սեքսուալ գործողությունների: Ապա ծեծի է ենթարկել տուժողին, գցել է հատակին, նստել նրա կրծքավանդակին ու նորից փորձել է սեքսուալ գործողություններ կատարել:
Իր կամքից անկախ պատճառներով Արմեն Բարսեղյանն ավարտին չի հասցրել հանցանքը, որովհետև հատակին ընկած կինը սեղանից վերցրել է ապակե տարա ու հարվածել Բարսեղյանի գլխին:
Այս դրվագով Արմեն Բարսեղյանին մեղադրանք է առաջադրվել ՀՀ քրեական օրենսգրքի 34-139 հոդվածի 1-ին մասով:
Բացի դրանից, հաջորդ օրը՝ դեկտեմբերի 29-ին, երբ վնասվածք ստացած Արմեն Բարսեղյանը գտնվել է «Սուրբ Գրիգոր Լուսավորիչ» բժշկական կենտրոնում, գիտակցելով, որ իր տրամադրած տեղեկությունը չի համապատասխանում իրականությանը, կեղծ հաղորդում է տվել իրեն այցելած ոստիկաններին, իբր նախորդ օրը «Թագավորանիստ» հյուրանոցային համալիրի չորրորդ սենյակում Մ.Բ.-ն փորձել էր իր գրպանից գողություն կատարել, ինչի պատճառով ինքը նրա նկատմամբ բռնություն է գործադրել:
Նախաքննությամբ, սակայն, այս տեղեկատվությունը չի հաստատվել, ու Արմեն Բարսեղյանին, բացի սեքսուալ բնույթի բռնի գործողություններ կատարելու փորձից, մեղադրանք է առաջադրվել նաև հանցագործության մասին սուտ հաղորդում տալու համար՝ ՀՀ քրեական օրենսգրքի 333 հոդվածի 1-ին մասով:
Բարսեղյանի խափանման միջոցը ստորագրությունն է չհեռանալու մասին: