«Առաջին լրատվական»-ի զրուցակիցն է ԱԻՄ առաջնորդ Պարույր Հայրիկյանը:
– Պարոն Հայրիկյան, որքանո՞վ է Հայաստանը պատրաստ դիմակայելու պոստպուտինյան ժամանակաշրջանին:
-Եթե պուտինյան շրջանին դիմակայելու տեսանկյունից նայենք, այսօր մի լուրջ խանգարող հանգամանք կա. մարդկանց հիմնական մասը չի հավատում, որ այդ գժությունն իրականություն է դառնալու: Սա բացասական դեր է կատարում: «Փանջունի» գեղարվեստական ֆիլմում ավելի լավ է ներկայացվում, քան հենց Երվանդ Օտյանի գրքում: Այնտեղ մի դրական կերպար կա, որն ասում է՝ լավ էլի, ուշադրություն մի դարձրեք, գժություն է, կխելոքանա, կանցնի: Հիմա հայերը դրանից դասեր չեն քաղել: Վերջում այդ մարդուն տեսնում ենք կիսամեռ պառկած անկողնում, քանի որ այդ գժությունն արհամարհեց: Ասում էր՝ մարդ է էլի, թող գիժ-գիժ խոսի:
Պուտինիզմը մեծագույն չարիք է, և այն պետք է կանխվի մեր ճակատում: Իհարկե, չեմ ասում գժական դրսևորումներ ունենալ, բայց հստակ հարցադրում դնել: Դրա համար պետք է ունենաս անցած ճանապարհ, փորձ և բավական խորը իմացություն: Մեր քաղաքական պետական այրերը, որ այսօր տիրում են լծակներին, ոչ սա ունեն, ոչ նա: Պուտինիզմն ուղղակի սպառնալիք է ազատ և անկախ Հայաստանին:
–Պարոն Հայրիկյան, այսօր գոյություն ունի հարթակ Ազատության հրապարակում, որը իշխանությունների արտաքին քաղաքական կուրսը կիսում է, անշրջելի համարում Հայաստանի՝ ԵՏՄ անդամակցությունը: Այս ամենին այլընտրանք չի ձևավորվում: Ինչո՞ւ:
– Լրատվամիջոցները, որպես կանոն, ծառայում են կա՛մ իշխանությանը, կա՛մ մյուս փողատերերին: Իշխանությունը Հայաստանում հադես է գալիս որպես դրամատեր և փորձում իր համար արհեստական այլընտրանք ստեղծել՝ այնքան բացահայտ ու ակնհայտ, որ դրա մասին խոսելն ավելորդ է: Տարիներ շարունակ իրար հետ Հայաստանն այս վիճակին են հասցրել, հանկարծ դառնում են ընդդիմություն: Նախագահական ընտրություններին չեն մասնակցում, որևէ ուժի չեն սատարում, դրանք ի՞նչ քաղաքական ուժ, դրանք քաղաքական ուժեր չեն:
Ինչ վերաբերում է անշրջելիության մասին բարբաջանքներին, միաժամանակ այնքան ցածրորակ են, որ չեն ասում անշրջելի վատ է, թե անշրջելի լավ: Ասեք՝ սա վատ իրավիճակ է, բայց մենք սրա դեմ չենք կարող որևէ քայլ գործադրել: Դա էլ չեն ասում, որովհետև նողկալի, վախկոտ արարածներ են: Կարծում են, թե հազար տարի պիտի ապրեն: Դու ո՞նց կարող ես Հայաստանի անկախության, ազատության կորուստը համարել անշրջելի:
Ավելին՝ տեսանյութում: