Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Լևոն Ավետիսյանի նախագահությամբ ավարտվել է Արամ Նահապետյանի գործի դատական քննությունը:
40-ամյա Արամ Նահապետյանը մեղավոր է ճանաչվել խուլիգանության համար՝ ՀՀ քրեական օրենսգրքի 258 հոդվածի 2-րդ մասով: Նա հանցագործության վայր է դարձրել «Շերլոք Հոլմս» ռեստորանը՝ անտեսելով բացահայտվելու և պատասխանատվության ենթարկվելու վտանգը…
Դատարանը հաստատված է գնահատել, որ 2014 թվականի հունվարի 29-ի ցերեկը՝ ժամը 15-ն անց 30-ի սահմաններում, Արամ Նահապետյանը մտել է Բաղրամյան պողոտայում գործող «Շերլոք Հոլմս» ռեստորանային համալիր և բարմեն Հակոբից պարտքով 5 հազար դրամ է խնդրել: Բարմենը մերժել է:
Արամը պատահական անցորդ կամ հաճախորդ չի եղել:
Հակոբը նրան ճանաչել է որպես ռեստորանի հարևանությամբ գործող ծաղկի խանութի աշխատակցի: Բայց այդ հանգամանքը, իհարկե, բավական չէր, որ Հակոբը պարտքով թեկուզ հինգ հազար դրամ հաներ ու տար ծաղկավաճառ Արամին:
Ըստ Հակոբի՝ ինքը Արամին բացատրել է, որ իր մոտ գումար չկա, իսկ ռեստորանի դրամարկղից չի կարող գումար տալ:
Արամը պահանջել է, որ Հակոբը զանգի ռեստորանի տիրոջ ընկերոջը: «Չերեզ» այդ «Վաթսոնի»՝ հինգ հազար դրամ ստանալու՝ Արամի ակնկալիքը նույնպես չի արդարացել. Հակոբը զանգել է, բայց ռեստորանատիրոջ ընկերը չի պատասխանել հեռախոսազանգին:
Հակոբը հայտնել է, թե մերժում ստանալուց հետո Արամը ռեստորանի սրահում գտնվող կին հաճախորդների ու կին աշխատողների ներկայությամբ սեռական բնույթի հայհոյանքներ է տվել իր հասցեին ու դուրս է եկել:
Մոտ տասնհինգ րոպե անց Արամը վերադարձել է որդու և երկու այլ տղամարդկանց հետ: Ըստ Հակոբի՝ չորսով քաշքշել են իրեն, փորձել են դուրս բերել ռեստորանից: Բայց չեն կարողացել:
Պարտքով փող ուզելու՝ Արամի այս «մեթոդը» նրան դեպի քրեական պատասխանատվություն էր տանում, բայց Արամը անտեսել է այդ հնարավորությունը:
Ռեստորանի աշխատակցուհիներից մեկը հրելով ու համոզելով Արամին դուրս է բերել սրահից, իսկ Հակոբը բանալիով փակել է դուռը:
Փողոցում հայտնվելով՝ Արամը շարունակել է բարձրաձայն հայհոյել: Ռեստորանում գտնվող երկու հաճախորդուհիները վախեցել են ու սպասել մինչև ոստիկանների ժամանելը, հետո նոր դուրս են եկել ռեստորանից:
Այդ օրը ռեստորանում փորձաշրջանի մեջ է եղել նոր աշխատակցուհի, ով այս միջադեպից վախեցել ու «Շերլոք Հոլմսում» այլևս աշխատելու չի գնացել…
Ռեստորանի ներսում կատարվածը տեսաձայնագրվել է անվտանգության տեսախցիկներով, այնպես որ Արամը առանձնապես հերքելու բան չի ունեցել: Նա իրեն մեղավոր է ճանաչել:
Ընդհանուր իրավասության դատարանը Արամ Նահապետյանին մեղավոր է ճանաչել խուլիգանության համար և դատապարտել է 3 ամիս կալանքի: