Այսօր Թունիսում նախագահական ընտրություններ են տեղի ունենում: Դրանք առաջինն են 2011 թ. հունվարի 14-ի «հասմիկե հեղափոխությունից» հետո, գրում է TASS-ը:
Երկրի շրջանների մեծ մասում քվեարկությունը սկսվել է տեղի ժամանակով 08:00-ին և կավարտվի 22:00-ին: Ալժիրին սահմանակից գավառներում ընտրատեղամասերը բացվել են 10:00-ին և կփակվեն 15:00-ին` ելնելով անվտանգության նկատառումներից:
Քվեարկությունն ընթանում է 33 շրջաններում, որոնցից 27-ը գտնվում են երկրի տարածքում: Արտասահմանում ընտրությունները սկսվել են դեռևս նոյեմբերի 21-ին:
Նախագահի պաշտոնին 27 մարդ է հավակնում: Նրանցից 5-ը հանել են իրենց թեկնածությունը, սակայն անունները կլինեն քվեաթերթիկներում: Թեկնածուների թվում են Թունիսի գործող նախագահ Մոնսեֆ Մարզուկին, նախկին վարչապետ Բեժի Քայիդ էս-Սեբսին, ԱԳՆ նախկին ղեկավար Բեն Ալին, «Էլ-Մուբադարա» կուսակցության առաջնորդ Քամել Մորժանը և այլք: Միակ կին թեկնածուն է իրավաբան, Թունիսի դատավորների Ասոցիացիայի առաջնորդ Հալթում Քանուն:
Ընտրությունների արդյունքները հայտնի կլինեն 3 օրից ոչ ուշ` վերջին ընտրատեղամասի փակվելուց ի վեր: Եթե թեկնածուներից ոչ ոք չհավաքի ձայների 50 տոկոսը, կնշանակվի ընտրությունների երկրորդ փուլը:
