Մեծ Բրիտանիայում մաստակ արտադրող ընկերությունները պետք է իրենց վրա վերցնեն մայթերի և ճանապարհների այն հատվածների մաքրման ծախսերը, որտեղ մաստակ է նկատվում: Նման առաջարկությամբ հանդես է եկել տեղական ինքնակառավարման բրիտանացի նախարարներից մեկը, գրում է The Telegraph-ը:
Ըստ Տեղական ինքնակառավարման ասոցիացիայի` Wrigley ֆիրման պետք է «զգալի ներդրում» կատարի մայթերի և ճանապարհների մաքրության համար: Ասոցիացիան նման ընկերություններին խորհուրդ է տվել ստեղծել բիոքայքայվող արտադրանք:
«Մաստակը մեր մայթերի ժանտախտն է: Մեծ Բրիտանիայում մաստակի արտադրության ինդուստրիան գործարարներին բազմամիլիոնանց եկամուտներ է բերում, մենք հավատում ենք «աղտոտում ես` վճարիր» սկզբունքին: Մենք ընկերություններին կոչ ենք անում սոցիալական պատասխանատվություն կրել իրենց բիզնեսի համար: Եվ գլխավոր պատասխանողը պետք է լինի Wrigley ընկերությունը, քանի որ այն խոշորագույնն է բրիտանական շուկայում»,- հայտարարել է Ասոցիացիայի մամլո քարտուղար Փիթեր Բոքսը: