Այսօր Ստամբուլում անցկացվել է ակցիա ԱՄՆ փոխնախագահ Ջո Բայդենի՝ Թուրքիա կատարած այցի դեմ: Այս մասին գրում է թուրքական Dogan գործակալությունը:
Ջո Բայդենը եռօրյա այցով գտնվում է Թուրքիայում, որի ընթացքում նա երկրի ղեկավարության հետ կքննարկի տարածաշրջանում տիրող իրաիճակը և ԴԱԻՇ («Իրաքի և Շամի իսլամական պետություն») ահաբեկչական խմբավորման դեմ պայքարը:
Թուրքիայի երիտասարդների միության շուրջ 300 ցուցարարներ Ստամբուլում երթ են անցկացրել Բայդենի այցի դեմ: Ցույցի մասնակիցները փողոց են դուրս եկել թուրքական դրոշներով և հակաամերիկյան կարգախոսներով պաստառներով: Երթի վերջում տեղի է ունեցել ցույց, որի ժամանակ Երիտասարդների միության նախագահ Չաղդաշ Ջենգիզը ցուցարարների անունից հայտարարություն է ընթերցել:
«Մենք դեմ ենք արտահայտվում ԱՄՆ-ի միջամտությանը մեր երկրի և ամբողջ տարածաշրջանի գործերին: Այսօր մենք հավաքվել ենք, որպեսզի ազդանշան ուղարկենք ամերիկացիներին և ամբողջ աշխարհին: Մեր ցույցի մեջ միավորվել են Իրաքի շունչը, Աֆղանստանի խիղճը, Սիրիայի սիրտը, Լատինական Ամերիկայի արժանապատվությունը և Թուրքիայի բողոքը»,- ասվում է նրանց հայտարարության մեջ:
Անցյալ շաբաթ Թուրքիայի երիտասարդների միության անդամները Ստամբուլի Էմինյոնյու թաղամասում հարձակվել էին երեք ամերիկացի նավաստիների վրա: Զինվորականները գտնվում էին Ստամբուլում չորս օրով՝ Սև ծովում ՆԱՏՕ-ի զորավարժություններից վերադառնալուց հետո: Բողոքարարները ամերիկացի զինվորականների վրա ներկ էին լցրել, գլխներին հագցրել պոլիէթիլենային տոպրակներ և բղավել հակաամերիկյան կարգախոսներ: Ակցիայի կազմակերպիչների խոսքերով՝ դա պատասխանն էր 2003 թվականին Իրաքի հյուսիսում գտնվող Սուլեյման քաղաքում տեղի ունեցած միջադեպի, որի ժամանակ ամերիկացի զինվորները ձերբակալել էին թուրք զինվորների՝ նրանց գլխներին պարկեր հագցնելով: