Շենգավիթ վարչական շրջանի ընդհանուր իրավասության դատարանում Ալեքսանդր Ազարյանի նախագահությամբ ընթանում է Ռոբերտ Աղաջանյանի գործի դատական քննությունը:
40-ամյա Ռոբերտ Աղաջանյանը Վրաստանի Հանրապետության քաղաքացի է: Բնակվել է երևանյան հանրակացարանում: Նա ամուսնացած է, երկու երեխա ունի:
Մեղադրվում է դիտավորությամբ ծանր մարմնական վնասվածք հասցնելու համար՝ ՀՀ քրեական օրենսգրքի 112 հոդվածի 1-ին մասով: Դեպքը տեղի է ունեցել 2011 թվականի փետրվարի 12-ի գիշերը:
Դեպքի օրը Երևանի Շիրակի փողոցում գտնվող հանրակացարանում բնակվող Ռոբերտի ընտանիքում խնջույք է եղել: Հանրակացարանային հարևան Գևորգ Ա.-ն ներկայացել է այդ խնջույքին ու Ռոբերտի տեսակետով՝ անվայել է պահել իրեն: Ռոբերտը նրան դիտողություն է արել, բայց Գևորգը շարունակել է նույն պահվածքը դրսևորել՝ չհեռանալով Ռոբերտի կնոջ կողքից:
Ըստ Ռոբերտ Աղաջանյանի շահերի պաշտպանի՝ դանակը եղել է Գևորգի մոտ: Ռոբերտը նրանից վերցրել է դանակը ու հարված է հասցրել Գևորգի ոտքին՝ մտածելով, թե կենսական կարևոր օրգանի չի խփում: Բայց հարվածն այնպիսին է եղել, որ վնասվել են տուժողի ազդրային զարկերակը, երակը, նրան պատճառվել է կյանքին վտանգ սպառնացող ծանր վնաս:
Այսպիսի վնասվածքից ու առատ արյունահոսությունից մահացու դեպքեր են լինում: Կոնկրետ այս տուժողի բախտը բերել է, նրա կյանքը փրկվել է:
Տուժող Գևորգը՝ երևի մոտ քառասուն տարեկան, դատարան էր եկել իր մայրիկի ուղեկցությամբ, ծնոտը ամբողջովին վիրակապված: Նա հազիվ էր խոսում, մայրն ասաց, որ Գևորգի առողջական վիճակը գնալով վատանում է, ներկա պահին ինքը ցավազրկողներ է ներարկել ու մի կերպ նրան ուղեկցել է դատարան:
Տուժողի վատառողջությունը կապ չունի Ռոբերտ Աղաջանյանի կատարած հանցանքի հետ: Գևորգը թմրամոլ է, ինչպես ասին՝ «բենզին անող», ու հիմա հիվանդություններից ծնոտը և ամբողջ օրգանիզմը քայքայվում են:
Տուժողն ու իր մայրն ասացին, որ ամբաստանյալից որևէ պահանջ չունեն:
Նախաքննության ընթացքում Ռոբերտ Աղաջանյանն իրեն մեղավոր չի ճանաչել: Բացի տուժողի առողջությանը ծանր վնաս հասցնելուց, նա մեղադրվում է նաև ՀՀ պետական սահմանը ապօրինի հատելու համար:
Դատարանում Ռոբերտ Աղաջանյանն ասաց, որ իրեն լիովին մեղավոր է ճանաչում, ու միջնորդեց գործը քննել արագացված կարգով:
Տուժողը չառարկեց ամբաստանյալի միջնորդության դեմ:
Մեղադրական եզրակացությունը հաստատած դատախազն առարկել էր գործը արագացված ընթացակարգով քննելու դեմ:
Դատարանում ամբաստանյալի միջնորդությունից հետո դատախազը կարող է փոխել իր դիրքորոշումը: Մեղադրող Մարգարյանը ժամանակ խնդրեց՝ իր դիրքորոշումը վերջնականորեն ճշտելու համար:
Հաջորդ դատական նիստին պարզ կլինի, թե ինչ ընթացակարգով կքննվի Վրաստանի քաղաքացի Ռոբերտ Աղաջանյանի գործը: