Ուրբաթ օրը Նյու Յորքի առևտրային բորսայում WTI տեսակի նավթի գինն աճել է: TASS-ի հաղորդմամբ՝ այս նավթի 2015թ. հունվարյան մատակարարումների ֆյուչերսային պայմանագրերն առևտրի վերջում կնքվել են 1 բարելի դիմաց 76.51 դոլարով, ինչը 0.66 դոլարով (0.87%) բարձր է նախորդ օրվանից: Շաբաթվա արդյունքներով՝ Նյու Յորքում նավթի գինն աճել է 0.9%-ով:
Ըստ վերլուծաբանների՝ նավթի թանկացմանը նպաստել են դրական նորությունները Չինաստանից և Եվրոպայից: Չինաստանի Կենտրոնական բանկը ուրբաթ օրը 2012 թվականից ի վեր առաջին անգամ որոշել է նվազեցնել տոկոսադրույքները՝ երկրի տնտեսությունը խթանելու համար: Իսկ Եվրոպական կենտրոնական բանկի նախագահ Մարիո Դրագին հայտարարել է, որ կարգավորողը ինֆլյացիոն ռիսկերի առաջացման դեպքում կարող է ընդլայնել ակտիվների գնումը՝ խթանելու համար տնտեսությունը:
Փորձագետները կարծում են, որ Չինաստանում և Եվրոպայում տնտեսական ակտիվության աճը նավթի համաշխարհային պահանջարկի մեծացման նախադրյալ կարող է լինել:
Առևտրի մասնկաիցները նաև սպասում են Նավթ արտահանող երկրների կազմակերպության նոյեմբերի 27-ի նիստին, որը տեղի կունենա Վիեննայում: Բացառված չէ, որ նիստի մասնակիցները որոշում ընդունեն նավթի գնի կայունացման նպատակով կրճատել արդյունահանման քվոտաները: