Տեղի ունեցավ իրավապաշտպան, Իրավունքի և ազատության կենտրոն Հ/Կ նախագահ Վարդան Հարությունյանի «Այլախոհությունը Խորհրդային Հայաստանում» գրքի շնորհանդեսը:
«Կուզենայի հատկապես կարդան երիտասարդները, որովհետև այս գիրքը մեր երեկ չէ առաջին օրվա օրն է, որտեղ ներկայացված են մարդիկ, ովքեր այդ օրվա հոսանքի մեջ համընթաց չեն եղել, այդ հոսանքից դուրս են եղել և այդ իմաստով հետաքրքիր են»,- նշեց հեղինակը:
Իրավապաշտպանը գրքի վրա աշխատել է մի քանի տարի, իսկ վերջնական տեսքի բերվել է վերջին մեկ տարվա ընթացքում:
Հարցին՝ կա՞ն այսօր քաղբանտարկյալներ Հայաստանում, Վարդան Հարությունյանն ասաց. «Իհարկե կան քաղբանտարկյալներ Հայաստանում: Անկախ Հայաստանը հրապուրիչ չէ ինձ համար նրանով, որ իր պատմության ընթացքում, չհաշված առաջին հինգ-վեց տարիները, ունեցել է քաղբանտարկյալներ: Կարծում եմ՝ նաև այս գիրքը պետք է ծառայի այն նպատակին, որ Հայաստանում չլինեն քաղբանտարկյալներ, որ հայաստանյան իշխանությունները, ովքեր էլ որ լինեն, հասկանան, որ դա չէ ճանապարհը, որ քաղբանտարկյալ ունեցող երկիրը պարտադիր կործանվում է: Եթե կործանվեց Խորհրդային Միությունը, ապա կկործանվեն մյուս քաղբանտարկյալ ունեցող երկրները նույնպես»:
ԳԽ նախկին պատգամավոր Ազատ Արշակյանն էլ նշեց, որ գրքում կոդավորված շատ բան կա, կան գաղտնիքներ, որ երբեք իրենք չեն ասի, քանի որ դրանք հրապարակման ենթակա չեն: «Այստեղ շատ բաներ չասված են ու չեն էլ ասվի, մանավանդ հիմա՝ ԵՏՄ-ում, դրանք, որպես նոր բացահայտված հանգամանքներ, կարող են դառնալ նոր գործի ալիք»,- նշեց Ազատ Արշակյանը:
ԳԽ նախկին նախագահ Բաբկեն Արարքցյանն իր խոսում նշեց, որ այս գրքի կարևորագույն մասը փաստաթղթային մասն է:
«Մի բան պետք է խոստովանեմ. ժամանակին դեմ էի Լյուստրացիայի օրենքի վերաբերյալ հարցը բարձրացնել Գերագույն խորհրդում: Ես փոխել եմ իմ կարծիքը»,- ասաց Բաբկեն Արարքցյանը՝ հավելելով, որ այսօր «Չեկա»-ն (ЧК) կա և՛ նախկին Սովետական Միության տարածքում, մասնավորապես՝ Հայաստանում:
Գրքում դատավճիռների լեզուն, նրա խոսքով, արդեն ցույց է տալիս, թե ինչ գարշելի երկրում ենք մենք ապրել:
«Գորբաչովը ուզում էր կառուցել սոցիալիզմ մարդկային դեմքով, դա չհաջողվեց: Ես չեմ հավատում մարդկային դեմքով բոլշևիզմին և չեկիստներին»,- ավարտեց իր խոսքը Բաբկեն Արարքցյանը: