ՀՀ ազգային վիճակագրական ծառայության պաշտոնական տվյալներով՝ 2013 թվականին աղքատության մակարդակը եղել է 32 տոկոս: «Առաջին լրատվական»-ը ԱՎԾ մարդահամարի և ժողովրդագրության բաժնի պետ Կարինե Կույումջյանից հետաքրքրվեց, ինչպես է այդ ցուցանիշն անդրադարձել միգրացիայի վրա, արդյոք աղքատությամբ պայմանավորված ավելացե՞լ է նաև արտագաղթի մակարդակը: «Գիտեք, մի քիչ դժվար է այդ առումով համեմատական տանել, որովհետև այդ խորությամբ համեմատություն չի արվել, բայց հետազոտության շրջանակում 2013 թվականին հարցումներ են արվել տնային տնտեսությունների միգրանտ անդամների վերաբերյալ, և պարզվել է, որ բնակչության 9.6 տոկոսը ներգրավված են եղել միգրացիոն տեղաշարժերում»,- ասաց տիկին Կույումջյանը: Վերջինիս խոսքով՝ միջպետական միգրացիան 2013-ին կազմել է 44 տոկոս, միջին ցուցանիշով՝ 26 հազար մարդ:
Ինչ վերաբերում է ժողովրդագրական պատկերին, ապա մասնագետի խոսքով՝ տարեկան կտրվածքով 2013 թվականին հանրապետությունում եղել է 41 հազար 790 ծնունդ, որը նախորդ տարվա համեմատությամբ նվազել է: Սակայն Կույումջյանի խոսքով՝ նվազել են նաև մահացության դեպքերը: Ծնելիության ցուցանիշի նվազումը, մեր զրուցակցի խոսքով, սկսել է 2010-2011 թթ., երբ արձանագրվել է ամենաբարձր ցուցանիշը, սակայն չի կարող ասել, թե ինչով է պայմանավորված: «Նման հետազոտություն չի արվել, իսկ պատճառները պարզելու համար անպատճառ հետազոտություն անհրաժեշտ է»,- ասաց Կույումջյանը:
Առավել մանրամասն՝ տեսանյութում: