Քիչ առաջ ավարտվեց իշխող Հանրապետական կուսակցության գործադիր մարմնի նիստը: Ինչպես լրագրողների հետ զրույցում ասաց ՀՀԿ խոսնակ Էդուարդ Շարմազանովը՝ քննարկվել են ներքաղաքական, ներկուսակցական հարցեր:
Նրա խոսքերով՝ Սերժ Սարգսյանը ներկայացրել է նաև Արցախ կատարած այցի մանրամասները. «Ադրբեջանն իրականացնում է անթույլատրելի քաղաքականություն, մենք ամեն ինչ արեցինք, որ դիվանագիտական խողովակներով հասնենք պարզաբանման: Մենք ամեն ինչ անելու ենք դիվանագիտական ճանապարհով լուծելու համար, իսկ այլ ճանապարհների մասով՝ ես այդ պաշտոնյան չեմ, որ այդ մասին խոսեմ: Անզեն ուղղաթիռ խոցելը միայն բարբարոսների ձեռագիր է: Հուսով ենք՝ միջազգային հանրությունը կշարունակի պրեսինգը»:
Ինչ վերաբերվում է Եռյակի կողմից վարչապետ Հովիկ Աբրահամյանի առաջարկը մերժելուն, Շարմազանովն ասաց, թե Եռյակից ԲՀԿ-ն այդ մասին ոչինչ չի ասել: Իրենք էլ Լևոն Զուրաբյանի ու Ռուբիկ Հակոբյանի հայտարարությունները չեն համարում Եռյակի կարծիք. «Մենք ակնկալում ենք, որ նաև «Բարգավաճ Հայաստանը» պատասխանի, որովհետև այդ հանդիպումից հետո ԲՀԿ-ն հստակ կարծիք չի արտահայտել: Ես չեմ կարծում՝ Լևոն Զուրաբյանն ու Ռուբիկ Հակոբյանը լիազորված են այլ կուսակցության փոխարեն հայտարարություն անելու»: