Այսօր «Մոսկվա» կինոթատրոնում «Ուրիշի փոխարեն» ռոմանտիկ կատակերգության պրեմիերան էր, որին ներկա էր ֆիլմի ստեղծագործական անձնակազմը՝ ռեժիսոր Հրանտ Երիցկինյանը, դերասաններ Հովհաննես Ազոյանը, Վահագն Սիմոնյանը (Պոնչոն), Սաթի Ջանիբեկյանը, Սոս Ջանիբեկյանը, Արամոն:
«Սցենարը գրվել է գարնանը, նկարահանումները սկսել ենք ամառվա սկզբին ու վերջացրել ենք աշնանը։ Նկարահանումները տևել են մեկ ամիս»,- հայտնեց ֆիլմի ռեժիսորը:
Թե ինչու է ֆիլմը նկարահանվել կատակերգության ժանրում՝ Հրանտ Երիցկինյանն այդ առնչությամբ կատակով ասաց, որ իրեն ճանաչողները միանգամից կհասկանային, թե ինչու իր դեբյուտը պետք է լիներ կատակերգություն:
Դերասան Սոս Ջանիբեկյանի խոսքերով՝ ֆիլմը մարդկային հարաբերությունների մասին է, որտեղ կա հերոս, չարագործ, որին վերջում հաղթում է բարին, կա հումոր, քանի որ ֆիլմը սիրային կատակերգություն է:
«Նպատակը չի եղել մարդկանց ծիծաղեցնելը: Չեն արվել հատուկ բաներ, որ լինեն ծիծաղելի: Ֆիլմի պատմությունը կառուցված է այնպես, որ որտեղ կլինի հումորը՝ կլինի գրագետ, մակարդակով հումոր»,- նկատեց դերասանը:
Հովհաննես Ազոյանը, խոսելով ֆիլմում իր կերպարի մասին, ասաց, որ առաջին անգամ է համագործակոցում Հրանտ Երիցկինյանի հետ, ու իր կերպարը կատակերգության ժանրի մեջ չարագործի կերպար է:
«Ինքը շատ լավ ճաշակ ունի: Ես վստահել եմ Հրանտի ճաշակին, համաձայնել եմ նրա հետ աշխատել, հիմա էլ եկել եմ ֆիլմը նայելու, դեռ չեմ տեսել»,- ասաց Հովհաննես Ազոյանը:
Ֆիլﬕ գործողությունները կատարվում են մեր օրերում: Գլխավոր հերոսը պլաստիկ վիրաբույժ Արսենն է (Սոս Ջանիբեկյան), որը փոքր հասակում ծնողների հետ ﬔկնել է Հայաստանից և բնակվում է Միացյալ Նահանգներում: Նա չէր էլ պատկերացնի, որ հայրենիքում կարող է անօրինական գործարքի մեջ ներքաշվել և «օգնել» հանցագործին ներկայանալ ուրիշի փոխարեն:
Ֆիլմում հանդես են եկել նաև դերասաններ Թամարա Պետրոսյանը, Լևոն Հարությունյանը, Վահագն Սիմոնյանը, Հասմիկ Ասլանյանը, Վասիլ Սարգսյանը, Մարինե Մխիթարյանը:
Վաղվանից ֆիլմը հնարավոր կլինի դիտել բոլոր կինոթատրոններում:
