«Դժվար է ասել՝ ադրբեջանցիները պատկերացնո՞ւմ են իրականում ինչ են արել, թե՞ ոչ»,- «Առաջին լրատվական»-ի հետ զրույցում ասաց ՌԱՀՀԿ ղեկավար Մանվել Սարգսյանը՝ անդրադառնալով ղարաբաղա-ադրբեջանական շփման գծում առաջացած իրավիճակին:
Նա նշեց, որ ներկայում դժվար է ասել, թե ինչպիսի հռետորաբանություն պետք է որդեգրեն ՀՀ իշխանությունները, կամ ինչպես պետք է պատասխանեն հակառակորդի ռազմական ագրեսիային հայկական պետությունների զինված ուժերի ներկայացուցիչները: Ըստ նրա՝ ցանկացած խորհուրդ կամ դիտարկում վտանգավոր է, քանի որ ԼՂ հակամարտությունն ու ղարաբաղա-ադրբեջանական շփման գիծն ինքնին աշխարհում միակն են, որտեղ հրադադար է պահպանվում 20 տարի:
«Աննախադեպ իրավիճակ է շփման գծում, աննախադեպ իրավիճակում այս կամ այն լուծումը կամ պատասխան առաջարկելն անլուրջ է և վտանգավոր: Իրավիճակը բարդ է նաև այն պատճառով, որ չկա համապատասխան փորձ: Դժվար է նաև ասել, թե ադրբեջանցիներն իսկապես պատկերացնո՞ւմ են, թե ինչ են արել, թե՞ ոչ: Հաշվարկել նման բաները, հետևանքները՝ դժվար է: Այն, ինչ կատարվում է, կարծես առաջին անգամ է: Այս իրավիճակում մի փոքր այս կամ այն կողմ, և միանգամից այլ իրավիճակ կստեղծվի՝ ինչպես օգոստոս ամսին: ԵԱՀԿ Մինսկի խումբը ևս չի կարողանում արդյունավետ գործել՝ ինչպես միշտ»,- նշեց Մանվել Սարգսյանը՝ եզրափակելով, որ իրավիճակը վտանգավոր է:
Հիշեցնենք. երեկ ԼՂ-ում ՀՀ նախագահ Սերժ Սարգսյանը նշել էր, որ ՀՀ ԶՈՒ և ԼՂ ՊԲ միասնական աննախադեպ զորավարժության մասնակիցների վարպետությունն արդեն ստիպում է «Ադրբեջանում ապրող շատ-շատ միամիտների փոխել իրենց կարծիքը պատերազմի մասին»:
«Նրանք մտածում էին, որ Ղարաբաղի, Հայաստանի դեմ կռվելը կարճ և հաճելի զբաղմունք է, ֆլեշմոբի պես մի բան՝ հավաքվեցինք, մի բան սարքեցինք, նկարվեցինք ու ցրվեցինք: Վե՛րջ, ֆլեշմոբ չի՛ լինելու: Հաճույք և զբոսանք չի՛ լինելու: Եվ վստահ եմ՝ պատերազմ չի լինելու, քանի որ դուք կաք, քանի որ դուք ուժեղ եք, քանի որ դուք կանգնած եք այստեղ»,- ասել էր նա:
Լուսանկարը` PanARMENIAN Photo-ի
