«Չի բացառվում, որ Արևմուտքին ձեռնտու է լարվածությունը Ղարաբաղում, բայց չկան ռեսուրսներ լուրջ միջամտությունների համար»,- «Առաջին լրատվական»-ի հետ զրույցում այս մասին ասաց ՌԳԱ Արևելագիտության ինստիտուտի Կենտրոնական Ասիայի, Կովկասի և Ուրալ-Պովոլժիեի ուսումնասիրության կենտրոնի աշխատանքային խմբի համակարգող Ալեքսանդր Սկակովն՝ անդրադառնալով նոյեմբերի 12-ին ադրբեջանական զինուժի կողմից հայկական ռազմական ուղղաթիռի ոչնչացման պատճառներին ու հետևանքներին:
Նա նշեց, որ տեղի ունեցածն անսպասելի մի դեպք որակելը դժվար է, քանի որ բոլորին է հայտնի, որ Բաքվի նպատակը ԼՂ հակամարտության գոտում լարվածությունը պահելն է: Ուստի, նրա խոսքով, եթե չլիներ ուղղաթիռ, կլիներ մեկ այլ բան, որից լարվածություն կառաջանար:
«Ավելին, չեմ կարծում, որ սա լայնածավալ ռազմական գործողություններ սկսելու մասին ազդանշան է, քանի որ Բաքվում իրատեսական իշխանություններ են նստած և հասկանում են, որ չեն կարող պատերազմել Հայաստանի հետ: Քանի դեռ Բաքվի իշխանությունները վստահ չեն, որ Ռուսաստանը չի միջամտի հակամարտությանը, պատերազմ չի սկսվի»,- նշեց Ալեքսանդր Սկակովը:
Վերջինս ասաց նաև, որ համաձայն չէ այն գնահատականներին, թե Ադրբեջանը փորձում է օգտվել Ռուսաստանի «զբաղվածությունից» Ուկրաինայում: Նրա համոզմամբ՝ Ռուսաստանը կարող է զբաղվել և Ուկրաինայում տիրող իրավիճակով, և Անդրկովկասով հատկապես հիմա, երբ Ռուսաստանն ակտիվ աշխատում է Կովկասում, Աբխազիայի հետ նոր պայմանագիր է կնքում և այլն:
« Ուստի ընդհանուր կապ չկա այս երկու զարգացումների միջև: Ռուսաստանն անվտանգության երաշխիքներ է տվել ոչ միայն Հայաստանին, այլև Լեռնային Ղարաբաղին, որն էլ Հայաստանին ստիպեց միանալ ՄՄ-ին և ոչ ԵՄ Ասոցացման համաձայնագրին: Այդ երաշխիքների մասին Ադրբեջանում գիտեն»,- նշեց Ալեքսանդր Սկակովը:
Վերջինս կարծիք հայտնեց, որ ԵԱՀԿ Մինսկի խմբի համանախագահ երկրների ներկայացուցիչները կփորձեն պարպել լարվածությունը՝ նախագահական մակարդակով հանդիպում կազմակերպելով: «Հաշվի առնելով լարված հարաբերությունները Ռուսաստանի և Արևմուտքի միջև՝ ՄԽ-ն գտնվում է լուրջ ճգնաժամի մեջ, միջնորդների միջև համաձայնություն չկա, որի պատճառով էլ առաջիկայում որևէ արդյունք չենք ունենա այս ձևաչափում»,- ընդգծեց Սկակովը: Նա հստակեցրեց, որ լարվածությունը ԼՂ հակամարտության գոտում ոչ Ռուսաստանին, ոչ Արևմուտքին ձեռնտու չէ: «Հաշվի առնելով աշխարհաքաղաքական զարգացումներն Իրաքում, Սիրիայում՝ Արևմուտքը ռեսուրսներ չունի, որպեսզի լուրջ կերպով միջամտի Հարավային Կովկասում առկա հակամարտություններին: Իհարկե, Արևմուտքը գուցե պլաններ ունենա իր հրադադարը հաստատի հակամարտության գոտում, սակայն դա այսօր Արևմուտքի համար ակտուալ չէ»,- ասաց Սկակովը:
Հիշեցնենք, որ նոյեմբերի 12-ին` տեղական ժամանակով ժամը 13:45-ի սահմաններում, շփման գծի արևելյան հատվածի օդային տարածքում Ադրբեջանի ԶՈւ-ի կողմից հրադադարի ռեժիմի խախտման պատճառով խոցվել է Արցախի ՌՕՈւ «Մի-24» ուղղաթիռ, որն ուսումնամարզական թռիչք էր կատարում: Այն տարածքը, որտեղ արձանագրվել է միջադեպը, շփման գծին բավականին մոտ է: Հակառակորդը միջադեպից հետո շարունակել է տարբեր տրամաչափերի զենքերից ինտենսիվ կերպով կրակ բացել միջադեպի վայրի ուղղությամբ: