Ադրբեջանի կողմից նորագույն զինտեխնիկայի գնումները դեռևս հաղթանակի երաշխիք չեն, կարևորը մարտական գործողությունների ճիշտ կազմակերպումն է, որին ՀՀ ԶՈՒ-ն տիրապետում է փայլուն կերպով: «Առաջին լրատվական»-ի հետ զրույցում այս մասին ասաց ռազմական փորձագետ Գագիկ Կարապետյանը՝ անդրադառնալով երեկ ադրբեջանական զինուժի կողմից ոչնչացված հայկական ռազմական ուղղաթիռին, դրա պատճառներին ու հնարավոր հետևանքներին:
Նա նշեց, որ նման միջադեպերի առաջին պատճառն այն է, որ Ադրբեջանը վստահ է իր անպատժելիության մեջ և այն բանում, որ միջազգային հանրության կողմից հակադարձ, զսպիչ գործողություններ չեն լինի: Բայց այդ հակադարձ գործողություններն, ըստ նրա, այսպես թե այնպես՝ լինելու են ԼՂ-ի կողմից: Գագիկ Կարապետյանն ասաց, որ հակադարձ գործողությունների հնարավորություններն ադրբեջանական բանակը չի հաշվարկում, չի մտածում, թե ինչ կկորցնի, ինչ զոհեր կունենա:
«Նրանք պարզապես ցանկանում են ցույց տալ, որ ուժեղ են և կարող են ցանկացած պահի ցանկացած իրավիճակում հնարավորության դեպքում հակահարված հասցնել ԼՂ ՊԲ-ին: Հնարավոր է՝ միջադեպի ամբողջական պատկերը դեռ պարզ չէ, պարզ չէ՝ եղե՞լ է արդյոք վերևից հրաման, թե՞ սպայի որոշում է: Հնարավոր է՝ մի թուրք սպա տեսել է մոտիկ թռչող ուղղաթիռ և առանց հրահանգ ստանալու՝ ինքնուրույն որոշում է կայացրել և ոչնչացրել ուղղաթիռը»,- ասաց փորձագետը:
Անդրադառնալով միջազգային հանրության և հակամարտության կարգավորման գործընթացին մասնակից երկրների քաղաքականությանը՝ փորձագետն ասաց, որ Ռուսաստանն ունի իր շահերը, որը կարող է Հայաստանի շահերի հետ չհամընկնել, և ինչպես Ռուսաստանն է հայտարարում՝ զենքի վաճառքն Ադրբեջանին բիզնես է, առևտուր, որն այդ երկիրն իրականացնում է ցանկացած երկրի հետ:
«Չեմ կարող ասել, որ ճիշտ չի անում: Մյուս կողմից՝ եթե Հայաստանը Ռուսաստանի հետ պայմանագիր ունի, ապա բարոյականության տեսանկյունից վաճառելը ճիշտ չէ»,- ասաց փորձագետը: Ինչ վերաբերում է Արևմուտքին, ապա նա նկատեց, որ Արևմուտքը քարկոծում է, և դրանով ամեն ինչ ավարտվում է:
Փորձագետը գտնում է, որ բացառել ռազմական գործողությունների վերսկսման հնարավորությունը՝ պետք չէ, քանի որ վերսկսման հնարավորությունը շատ ավելի մեծ է, քան պատերազմի բացառման: «Եթե Ադրբեջանը զինվում է, փաստացի տարածքային պահանջատեր է, ապա ցանկանում է ինչ-որ գործողություն սկսել, պարզապես չի հանդգնում»,- ասաց փորձագետը:
Մանրամասնելով հակամարտող երկրների ԶՈՒ պատրաստվածությունը՝ Գագիկ Կարապետյանը նշեց, որ Ադրբեջանի սպառազինությունում կա տարբեր երկրներից գնված զենք, թեև առյուծի բաժինը ռուսական զենքինն է:
«Սակայն կա այդ զենքի սպասարկման, օգտագործման հարց, կան տեխնիկական նրբություններ, որոնց ադրբեջանական կողմը չի տիրապետում, և չգիտեմ, թե որքանով է Ադրբեջանը պատրաստ այդ զենքերն օգտագործել ըստ նշանակության: Նորագույն տեխնիկայի գնումները դեռևս հաղթանակի երաշխիք չեն: Ղարաբաղյան պատերազմի առաջին փուլում ադրբեջանցին զինված էր տանկերով, իսկ մենք ընդամենը ավտոմատ ունեինք, և արդյունքը պարզ տեսանք: Այսինքն՝ զինվելը, սպառազինություններով առաջ գնալը հաղթանակ չի կարող երաշխավորել: Շատ կարևոր է մարտական գործողությունների ճիշտ կազմակերպումը և սպառազինության արդյունավետ կիրառումը, իսկ Ադրբեջանն այսօր դա չունի, զենքի քանակը շատ է, բայց կիրառումը խնդիր է:
Մեր թերությունը երևի թե սպառազինության քանակական հարաբերակցությունն է, բայց մենք գիտենք, թե ինչու ենք կռվում, մեր մարտական ոգին բարձր էր և բարձր է. դա է ցույց տալիս նաև պատմությունը»,- ասաց ռազմական փորձագետ Գագիկ Կարապետյանը: