Ադրբեջանական News.az կայքի փոխանցմամբ, ադրբեջանական քաղաքագետ Օգտայ Սադիխզադեն անդրադարձ է կատարել ռուս-ադրբեջանական հարաբերություններին ու Լեռնային Ղարաբաղի հիմնախնդրի կարգավորմանը.
«Ես կարծում եմ, որ հաշվի առնելով արաբական աշխարհի վերջին զարգացումները` Wikileaks-յան բացահայտումները` Ադրբեջանը չպետք է հեռանա Ռուսաստանից: Ընդհակառակը, Ադրբեջանը պետք է միանա Հավաքական անվտանգության պայմանագրի կազմակերպությանը (ՀԱՊԿ):
Դա ռազմական և ռազմավարական առումով Ադրբեջանին առավել կմերձեցնի Ռուսաստանի հետ: Ադրբեջանն այդ ժամանակ Ռուսաստանի համար կհանդիսանա առավել սերտ դաշնակից, քան ներկայումս է:
ՀԱՊԿ-ին Ադրբեջանի անդամակցելը կավելացնի Ռուսաստանի միջնորդական կշիռը Լեռնային Ղարաբաղի հակամարտության կարգավորման հարցում: Ի տարբերություն Ադրբեջանի, Հայաստանը հանդիսանում է ՀԱՊԿ անդամ:
Դա մի կողմից մեզ ձեռնտու է նրա համար, որ մեր դիվանագիտական մանևրայնության հնարավորություններն առավել մեծ են, սակայն մյուս կողմից էլ դա մեզ համար ունի իր բացասական կողմը. ռազմական ու ռազմավարական առումով Հայաստանն առավել սերտ հարաբերությունների մեջ է Ռուսաստանի հետ, քան մենք:
Ես ցանկանում եմ ընդգծել, որ Ադրբեջանը պետք է գնա այդ քայլին` հաշվի առնելով արաբական աշխարհի վերջին զարգացումները, ինչն, անկասկած, արվում է ԱՄՆ-ի և, մասնավորապես, Կենտրոնական հետախուզական վարչության (ԿՀՎ) աջակցությամբ:
Այս ամիս Սոչիում կայացած նախագահների հանդիպումը կոչված էր չափավոր հաջողություն արձանագրելուն: Ռազմագերիների փոխանակման մասին կնքված փաստաթուղթը հումանիտար իմպուլս է հաղորդում բանակցային գործընթացին: Սակայն դա բավարար չէ այդ գործընթացի հաջող ընթացքի համար:
Ներկայումս Ռուսաստանը, հանձինս իր նախագահ Դմիտրի Մեդվեդևի, որոշակի ջանքեր է գործադրում` Մադրիդյան սկզբունքներին համապատասխան, հակամարտող կողմերի մոտեցումները համաձայնեցնելու ուղղությամբ: Կարծես թե, Ռուսաստանը փորձում է ամբողջովին իր վերահսկողության տակ վերցնել Լեռնային Ղարաբաղի հակամարտության կարգավորման ողջ գործընթացը:
Ռուսաստանը փորձում է դինամիկություն հաղորդել բանակցային գործընթացին, ինչը մասամբ հաջողվել է նրան: Նա որոշակի ճնշում է գործադրում Երևանի վրա, որպեսզի վերջինս որոշակի ուղղումներ մտցնի իր դիրքորոշման մեջ: Սակայն ժամանակը ցույց կտա, թե որքան արդյունավետ կլինի Կրեմլի այդ քայլը»:
Հիշեցնենք, որ ՀԱՊԿ-ն կազմավորվել է 1992 թվականի մայիսի 15-ին` Տաշքենդյան պայմանագրի հիման վրա, որը ստորագրել են Հայաստանը, Ռուսաստանը, Ղազախստանը, Ղրղզստանը, Տաջիկստանն ու Ուզբեկստանը:
1993 թվականի սեպտեմբերի 9-ին նրանց միացավ Վրաստանը, իսկ սեպտեմբերի 24-ին` Ադրբեջանը: Սակայն հետագայում այս երկու երկրները հրաժարվեցին ՀԱՊԿ պայմանագիրը երկարաձգելուց: