Ղազախստանի Ալմա-Աթա քաղաքում շարունակվում է ծանրամարտի աշխարհի առաջնությունը:
Հայաստանը ստուգատեսին ներկայացել է խոշոր՝ 14 ծանրորդներից (8 ծանրորդ և 6 ծանրորդուհի) կազմված պատվիրակությամբ: Մրցաշարը հատկապես կարևոր է այն տեսանկյունից, որ համարվում է օլիմպիական վարկանիշային:
Այո, առաջնությանը վնասվածքի պատճառով չի մասնակցում աշխարհի 2010թ. չեմպիոն Տիգրան Մարտիրոսյանը, ով, անխոս, 77 կգ քաշային կարգում աշխարհի լավագույն ծանրորդներից է, կան մի շարք երիտասարդ կամ երկարատև դադարից հետո շարք վերադարձած ծանրորդներ, բայց դրանք միայն պատճառներ են: Անգամ այդ պատճառների հիմնավորված լինելու պարագայում առաջնայինն արդյունքն է, որն առայժմ չկա:
Մեր ազգային թիմը ներկայացնող 9 ծանրորդներ (5 ծանրորդ և 4 ծանրորդուհի) արդեն ավարտել են ելույթները: Առայժմ մեդալներ, անգամ փոքր մեդալներ չունենք: 9 ծանրորդներից միայն 2-ը՝ Վանիկ Ավետիսյանն ու Արա Խաչատրյանն են ելույթները սկսել A խմբում: Մնացած ծանրորդները հայտավորվել են B, C խմբերում, որը խոսում է այն մասին, որ մենք լուրջ հավակնություններ չենք կարող ունենալ տվյալ մարզիկի հետ կապված:
Միգուցե, ակնկալիքները մեծ չլինեին, եթե հայկական ծանրամարտը չունենար ավանդույթներ, չունենար մարզիկներ, որոնք փայլում էին ոչ վաղ անցյալում:
Հուսանք, որ դեռ հաջողություն կգրանցենք ղազախական ստուգատեսում: Դեռ պայքարի դուրս չի եկել կանանց գերծանր քաշային կարգում Հայաստանը ներկայացնող, Լոնդոնի օլիմպիական խաղերի բրոնզե մեդալակիր Հռիփսիմե Խուրշուդյանը: Եթե Հռիփսիմեն կարողանա մոտ 1 տարվա դադարից հետո լավ մարզավիճակով մոտենալ մրցմանը, ապա մենք արծաթե մեդալի լուրջ հավակնություններ կունենանք, քանի որ Չինաստանը ներկայացնող Զու Լու Լուն, ով հաղթեց «Լոնդոն-2012»-ում, չի մասնակցելու առաջնությանը:
Հավակնություններ ունենք նաև տղամարդկանց գերծանր քաշային կարգում Ռուբեն Ալեքսանյանից, 105 կգ քաշային կարգում՝ Սիմոն Մարտիրոսյանից: 69 կգ քաշային կարգում Մելինե Դալուզյանը վնասվածքից ապաքինվելուց հետո A խմբում 10 մասնկիցների մեջ երկամարտի ամենացածր նախանական պատվերն է ներկաայցրել՝ 232 կգ: Մինչ այժմ մեր ծանրորդները գրանցել են հետևյալ արդյունքները՝
Տղամարդիկ
Սմբատ Մարգարյան (21 տարեկան), B խումբ, 56 կգ – 256 կգ (109+147), 7-րդ տեղ
Վանիկ Ավետիսյան (27տ), A խումբ, 69 կգ – 320 կգ (141+179), 5-րդ տեղ
Հակոբ Մկրտչյան (17տ), C խումբ, 77 կգ – 320 կգ (140+180), 5-րդ տեղ
Արա Խաչատրյան (32տ), A խումբ, 77 կգ – 330 կգ (150+180), 16-րդ տեղ
Աղասի Աղասյան (26տ), B խումբ, 85 կգ – 353 կգ (156+197), 5-րդ տեղ
Կանայք
Էլեն Գրիգորյան (26տ), C խումբ, 48կգ – 148 կգ (65+83), 8-րդ տեղ
Աննա Գովելյան (25տ), B խումբ, 53 կգ – 175 կգ (80+95), 10-րդ տեղ
Քրիստինե Պետրոսյան (22տ), C խումբ, 63 կգ – 189 կգ (87+102), 8-րդ տեղ
Իզաբելլա Յայլյան (19տ), B խումբ, 63 կգ – 207 կգ (97+110), 7-րդ տեղ