Վրաստանում տեղի ունեցածը Կրեմլի նախաձեռնությունն է, բայց մասամբ. տարածաշրջանը պետք է զգուշանա ՌԴ միջամտության փորձից: «Առաջին լրատվական»-ի հետ զրույցում այս տեսակետներին ու Վրաստանի նոր իշխանությունների՝ Հայաստանի նկատմամբ ներկայիս քաղաքականությանն անդրադարձավ թբիլիսյան Black Sea Press գործակալության գլխավոր խմբագիր, քաղաքագետ Գելա Վասաձեն՝ անդրադառնալով Վրաստանում սկսված քաղաքական ճգնաժամին:
Նա նշեց, որ աշխարհում տեղի ունեցող իրադարձությունները, ուկրաինական զարգացումները մեծ ազդեցություն են ունենում Կովկասի և Վրաստանի վրա: Սակայն, նրա բնորոշմամբ, այն, ինչ այսօր ընթանում է Վրաստանում, սպասելի էր և սպասելի էր դեռևս 2 տարի առաջ, պարզապես եղան որոշակի գործընթացներ, որոնք նպաստեցին, որպեսզի պաշտոնանկությունները տեղի ունենային այս շրջանում:
«Վրաստանի արտաքին քաղաքական կուրսի համար պատասխանատու ողջ բլոկը հեռացել է կառավարությունից: Սա Վրաստանի իշխանությունների ներսում երկու հզոր՝ պրոռուսական և պրոարևմտյան ուժերի բախման պայքարի հետևանքն է: Ես չէի ասի, որ այս ամենը պրոռուսական ուժերի նախաձեռնությունն էր, ավելի հավանական է, որ սա պրոարևմտյան ուժերի նախաձեռնությունն էր, իսկ պրոռուսականները փորձեցին առաջ ընկնելով գործել:
Ի՞նչ տեղի կունենա՝ դժվար է կանխատեսել, քանի որ շատ կարևոր է հասկանալ՝ կմնա՞ արդյոք կոալիցիայի կազմում Հանրապետական կուսակցությունը: Եթե Հանրապետական կուսակցությունը հեռանա, ապա «Վրացական երազանքը» կկորցնի իր մեծամասնությունը խորհրդարանում: Տարբերակները շատ են, սկսյալ արտահերթ խորհրդարանական ընտրություններից մինչև այլ գործընթացներ»,- մեկնաբանեց Գելա Վասաձեն՝ շարունակելով պարզաբանել, թե ինչ գործոններ պատճառ դարձան նման զարգացումների համար:
Նրա համոզմամբ՝ Ռուսաստանի ակնհայտ թուլացումը պայմանավորված է ուկրաինական զարգացումներով: Վասաձեի խոսքով՝ Կրեմլը փորձում է Վրաստանի իշխանություն դուրս բերել անկեղծ պրոռուսական ուժերին, որովհետև ներկայիս իշպխանությունները նշում են, որ իրենք եվրաինտեգրացիայի կողմնակիցն են, կան ավելի ռադիկալ պրոռուսական ուժեր, ինչպես Նինո Բուրջանաձեն և ուրիշներ:
«Արդեն հեռացած գործիչները հասկացան, որ եթե շարունակեն այս իշխանության հետ կառավարության նույն կազմում աշխատել, ապա կզրկվեն քաղաքական ապագայից: Ուստի նրանք որոշեցին, որ ժամանակն է հեռանալ կոալիցիայից և հավակնել երկրում այլ իրավիճակի, իսկ այն, որ երկրի ապագան Եվրոպայում է, կասկած չի կարող լինել:
Ես այս զարգացումներում պրոռուսական ուժերի հաղթանակը բացառում եմ միայն այն պատճառով, որ բնակչությունը չի սատարի, իսկ ելքը կարող էր լինել դիկտատուրայի սահմանումը, այնինչ նման զարգացումը կտապալվի, քանի որ երկիրն ու ժողովուրդն այն չեն ընդունի»,- ասաց վերլուծաբանը՝ հավելելով, որ սա անկայունության հերթական ալիքն է տարածաշրջանի համար: Ըստ նրա՝ սա նոր հնարավորություն է Ռուսաստանի համար՝ միջամտելու տարածաշրջանում տիրող իրավիճակին:
«Սա Կրեմլի նախաձեռնությունն էր ինչ-որ իմաստով, բայց դեռևս 2009թ. ես ասում էի, որ մի օր պրոռուսական լոբբին կազատվի պրոարևմտյանից: Այնինչ հակառակը տեղի ունեցավ, իսկ պրոռուսական ուժերի ի հայտ գալու համար այս փուլն այնքան էլ հաջող չէ»,- ասաց Գելա Վասաձեն:
