Կառավարության այսօրվա նիստում Տիգրան Սարգսյանը մի քանի դիտողություն է արել: Նա հայտարարել է, թե ահազանգող եւ վտանգավոր են դարձել այն բողոքները եւ միտումները, որոնք դրսեւորվում են կրթության եւ առողջապահության ոլորտներում։ «Կոռուպցիան այս երկու ոլորտներում խորացել է։ Դրա մասին են վկայում եւ՛ վերլուծական նյութերը, որոնք դարձել են հանրության համար արդեն հասանելի, եւ՛ մեր վերլուծությունները, եւ՛ մեր վերահսկողական ծառայությունների աշխատանքները։ Մենք խորհրդակցություն ենք անցկացրել կրթության եւ գիտության նախարարությունում»,- ասել է Սարգսյանը։ Նա հանձնարարել է ԿԳ նախարար Արմեն Աշոտյանին 10 օրվա ընթացքում ներկայացնել գործողությունների ծրագիր, «որպեսզի մենք այլեւս չհանդուրժենք կոռուպցիոն երեւույթները կրթական համակարգում, ընդհուպ մինչեւ կադրային փոփոխություններ։ Պետք է թարմացվեն խորհուրդների կազմերը բուհերում, եւ այն անձանց, որ մենք ենք ներկայացնում, հստակ հանձնարարականներ պետք է տրվի, եւ այդ ուղղությունը պետք է լինի ամենակարեւորը` բացահայտել թերությունները եւ այդ թերությունների դեմ պայքարել»,- ասել է վարչապետը։ Տիգրան Սարգսյանը նաեւ դժգոհել է առողջապահության ոլորտից` կրկին կոռուպցիայի հետ կապված: Առողջապահության նախարար Հարություն Քուշկյանին էլ հանձնարարարել է 10 օրվա ընթացքում վարչապետին ներկայացնել առաջարկություններ, ընդհուպ մինչեւ կադրային փոփոխություններ` սկսած աշխատակազմի ղեկավարից` ավարտած նախարարի տեղակալներով, որոնք այդ գործառույթներին մասնակցում են կամ բավարար չափով չեն պայքարում այս երեւույթների դեմ։
