Երկրապահ կամավորականների միությունում այսօր տեղի ունեցավ «Հանրակրթական դպրոցներում 2014-15 ուստարում «Պատանի երկրապահ» ակումբի ձևավորմանը և հայրենասիրական դաստիարակությանն ուղղված միջոցառումների ուղեցույց» մեթոդական ձեռնարկի շնորհանդեսը:
Հայաստանի Հանրապետության կրթության և գիտության ու պաշտպանության նախարարությունները և «Երկրապահ կամավորական միություն» հասարակական կազմակերպությունը 2014 թվականի սեպտեմբերի 9-ին կնքեցին փոխըմբռնման հուշագիր, որի նպատակն է խթանել սովորողների հայրենասիրական դաստիարակությանը: Ուղեցույցի նպատակն է օգնել ուսումնական հաստատություններին՝ պատշաճ մակարդակով իրականացնելու սովորողների հայրենասիրական դաստիարակությանը միտված միջոցառումները՝ ապահովելով դրանց արդյունավետությունը:
Միջոցառմանը մասնակցում էր ՀՀ պաշտպանության նախարար Սեյրան Օհանյանը: Նա ընդգծեց, որ այս միջոցառումը շատ կարևոր է: Նախարարը ողջունեց ձեռնարկի լույսընծայումը. «Այսօր մենք իրականացնում ենք դարերով մեզ փոխանցված այն գաղափարը, որ պետք է հավատարիմ լինենք մեր պատմությանը, մեր հաղթանակներին՝ հետագա պատմությունն ու զարգացումն ապահովելու համար»:
Սեյրան Օհանյանի խոսքով՝ սերնդափոխության այս գաղափարն ամենակարևորն է մեր գործունեության ընթացքում. «Այսօրվա միջոցառման գաղափարը շարունակական է, որովհետև մենք մեր ցանկությունն այսօր իրականացնում ենք, այն հռչակագիրը, որ ստորագրվեց մի քանի ամիս առաջ, այսօր վերածվել է մի ծրագրի, որն իրականացվելու է մեր դպրոցներում»:
ԿԳ նախարար Արմեն Աշոտյանն իր հերթին ընդգծեց, որ ուրախ է այս եռակողմ համաձայնագրի իրականացման շրջանակներում համակարգված գործողությունների անցնելու համար. «Ես շատ եմ ուզում, որ 1400 դպրոցներում հաջորդ տարի ունենանք այն ամենը, ինչի մասին խոսվում է ձեռնարկում. դա մեզնից պահանջում է հետևողական աշխատանք, դիմակայություն քննադատության հանդեպ, որովհետև, անկասկած, քննադատություն ևս լինելու է»:
Երկրապահ կամավորական միության նախագահ, ԱԺ պատգամավոր Մանվել Գրիգորյանը շնորհավորեց բոլորին և շնորհակալություն հայտնեց այն ծնողներին, ովքեր վստահել են և իրենց երեխաներին ընդգրկել Երկրապահ կամավորական միության շարքերում. «8 թոռ ունեմ, որոնցից 7-ը երկրապահ են, մեկը չի քայլում դեռ՝ հենց քայլի, նա էլ երկրապահ կդառնա»:
Վերջում Մանվել Գրիգորյանն ավելացրեց, որ Հայաստանը մեր տունն է, այստեղ պետք է շարունակենք ապրել, պայքարել՝ Արցախի հետ միասին. «Կյանքում չհավատաք՝ հայ ժողովուրդն այս երկրից չի ոչնչանա»:
Առավել մանրամասն՝ տեսանյութում:
Լուսանկարը՝ Armenpress-ի