Ուկրաինան կարող է սերտ հարաբերություններ պահպանել ինչպես Ռուսաստանի, այնպես էլ Եվրոպայի երկրների հետ, և այն պետք է կամուրջ լինի նրանց միջև: PBS ալիքին տված հարցազրույցում այսպիսի կարծիք է հայտնել ԱՄՆ պետքարտուղար Ջոն Քերին:
Նրա խոսքով՝ Արևմուտքի սահմանած պատժամիջոցներն «ազդեցություն ունեցել են, ռուբլին ամենացածր մակարդակի վրա է՝ սկսած այն պահից, երբ 1999թ. ներմուծվել է «եվրոն», նրանք (ռուսները) միլիարդավոր դոլարներ են ծախսում՝ հանուն ռուբլու աջակցության»:
Քերին նշել է, որ նավթը ևս էժանացել է, ինչը, ըստ նրա, բացասաբար է ազդում Ռուսաստանի բյուջեի և տնտեսության վրա: «ՀՆԱ-ն նվազում է, չի աճում, նրանք լուրջ խնդիրներ ունեն»,- ասել է Քերին:
Միաժամանակ, Քերին կարծում է, որ «Ուկրաինան կարող է կամուրջ դառնալ ՌԴ-ի և Եվրոպայի միջև: Սակայն նրա խոսքով՝ Ռուսաստանի ղեկավարությունը «պետք է կառուցողաբար աշխատի, ոչ թե խախտի վարքի նորմերն ու չափանիշերը», որոնցով միջազգային հանրությունն առաջնորդվել է «Երկրորդ համաշխարհային պատերազմից սկսած»: