Հոկտեմբերի վերջի ու նոյեմբերի սկզբի համար ավանդական ուրախության մթնոլորտը տիրել է ողջ Մեքսիկայում՝ երկիրը տոնում է Մեռյալների օրը: Այս մասին հայտնում է RIA Novosti-ն:
Չնայած անվանմանը՝ դրանում ոչ մի չարագույժ բան չկա՝ բացի հազարավոր ներկված ու «կենդանի մեռելների» նման հագնված մարդկանցից, որ շրջում են փողոցներով:
Տոնի արմատները հասնում են մինչիսպանական դարաշրջան, երբ ացտեկները հիշում էին մեռյալներին, իսկ տոնի գլխավոր հերոսը պարոն Մեռյալն էր՝ Միտլանտեկուտլին:
Տոնն անցկացվել է հուլիս-օգոստոսին, սակայն Մեքսիկայի նվաճումից հետո իսպանացի հոգևորականները որոշեցին այն տեղափոխել նոյեմբերի սկիզբ: Հեթանոսական տոնը նրանց այդպես էլ չհաջողվեց արմատախիլ անել, սակայն ժամանակակից Մեքսիկայում այդ տոնը վերածվել է սովորական ուրախության:
Մեխիկոյի կենտրոնական Սոկալո հրապարակում տեղադրվել են հսկայական գանգեր ու անդրշիրիմյան թեմատիկ ինստալյացիաներ:
Նոյեմբերի 1-ին մեքսիկացիները հիշում են ննջեցյալ երեխաներին, նոյեմբերի 2-ին ՝ մեծահասակ:
Այս օրերին ընդունված է այցելել գերեզմանոցներ, սակայն անգամ այդ տխուր արարողությունն է մեքսիկացիների մոտ լի ուրախությամբ ու դրական էմոցիաներով: Համարվում է, որ այդ օրերին անհրաժեշտ է իրենց մեռյալներին ավելի շատ ուրախություն պատճառել:
Մեռյալների օրը ՅՈՒՆԵՍԿՕ-ն ճանաչել է ոչ նյութական մշակութային ժառանգություն: Այն մեքսիկական մշակույթի ամենավառ ավանդույթն է: