«Դաշնակցություն» խմբակցության պատգամավոր Արծվիկ Մինասյանի կարծիքով, ռուսական ռուբլու կուրսի աստիճանական և անընդմեջ անկումը բավական բացասական ազդեցություն կարող է ունենալ Հայաստանի տնտեսության վրա: Իսկ վերջին ամիսներին ռուսական ռուբլին դոլարի նկատմամբ արժեզրկվել է մոտ 30 տոկոսով: Եվ այդ կուրսի անկումը կարող է բացասաբար ազդել ինչպես մեր երկու երկրների միջև առկա առևտրային պայմանագրերի, այնպես էլ Ռուսաստանից եկող տրանսֆերտների վրա:
«Մեր քաղաքացիների ուղարկած տրանսֆերտներն էական գնանկում են ունենալու, արժեզրկվելու է այդ գումարը: Իսկ դա նշանակում է, որ Հայաստանում ռուսական ռուբլիով տրանսֆերտների ազդեցությունն էականորեն նվազելու է տնտեսության ակտիվ գործարքների հետ կապված: Մյուս կողմից էլ սա կարող է հանգեցնել տնտեսվարող սուբյեկտների պայմանագրերի վերանայմանը, ինչը բնականաբար վնաս է մեր տնտեսվարող սուբյեկտների համար»,- ասում է պատգամավորը:
Այնուամենայնիվ, ռուսական ռուբլու անկումն ի՞նչ չափով կարող է բացասական ազդեցություն ունենալ մեր երկրի տնտեսական զարգացումների վրա: Արդյո՞ք այդ անկման պայմաններում իրատեսական կարող է համարվել 2015 թ. համար ծրագրված տնտեսական աճի իրականացումը: Այս օրերին Ազգային ժողովում քննարկվող՝ 2015 թ. բյուջեի նախագծով պլանավորված է, որ հենց այդքան էլ պետք է լինի տնտեսական աճը: «Դժվար է ասել, հատկապես որ դեռ պարզ չէ, թե Եվրասիական տնտեսական միությանն անդամակցելու հանգամանքն ինչ ազդեցություն կարող է ունենալ Հայաստանի տնտեսության վրա: Բայց բացասական առումով էականորեն ազդելու է մեր տնտեսական աճի և զարգացումների վրա»,- ասաց Ա. Մինասյանը:
Պատգամավորը նաև կարծում է, որ այս ընթացքում Հայաստանի Կենտրոնական բանկը ինտերվենցիաներ է կատարում ռուբլու կուրսի անկումը հնարավորինս անցնցում դարձնելու համար: «Մյուս կողմից էլ՝ ՀՀ ԿԲ-ն վարում է կարգավորվող քաղաքականություն, իսկ դա նշանակում է, որ ԿԲ-ն իր պահուստներից զգալի միջոցներ պետք է ծախսի, որպեսզի փորձի ապահովել ռուբլու սահուն, ոչ թե ցնցումային գնանկումը»,- ասաց նա: