«Առաջին լրատվական»-ի տեղեկություններով՝ Հայաստանի Հանրապետության՝ Եվրասիական տնտեսական միությանը միանալու մասին պայմանագիրն ԱԺ-ում կներկայացվի մոտ ապագայում: Մեր աղբյուրների փոխանցմամբ՝ պայմանագիրը խորհրդարանին կփոխանցվի նոյեմբերի 17-ին: Ի դեպ, այն պետք է խորհրդարանին փոխանցվի ՀՀ նախագահի աշխատակազմից: Ամենայն հավանականությամբ, ԱԺ-ի կողմից այդ պայմանագրի վավերացման համար կհրավիրվի արտահերթ նիստ, քանի որ քառօրյան նախորդելու է նոյեմբերի 17-ին:
Թեև ԱԺ-ում ներկայացված ուժերը դեռ չեն ծանոթացել պայմանագրի նախագծին և չեն կարող պաշտոնական դիրքորոշում հայտնել դրա վերաբերյալ, փորձագիտական հանրության շրջանում մեծ վստահություն կա, որ ԱԺ-ն կվավերացնի պայմանագիրը, քանի որ խորհրդարանում ներկայացված քաղաքական ուժերի ճնշող մեծամասնությունը՝ բացառությամբ «Ժառանգություն» և «Ազատ դեմոկրատներ» կուսակցությունների, կողմ են Հայաստանի՝ ԵՏՄ անդամակցությանը՝ անկախ անդամակցության պայմաններից:
Հիշեցնենք, որ Հայաստանի նախագահ Սերժ Սարգսյանը հայտարարել էր Ռուսաստանի նախաձեռնած եվրասիական ինտեգրացիոն պրոյեկտներին միանալու մասին նախորդ տարվա սեպտեմբերի 3-ին, իսկ այս տարի հոկտեմբերի 10-ին Հայաստանի նախագահը Մինսկում ստորագրեց ԵՏՄ-ին միանալու մասին պայմանագիրը, որն ուժի մեջ կմտնի 2015թ. հունվարի 1-ից:
