Երգչուհի Թեյլոր Սվիֆթը դարձել է Cosmopolitan Բրիտանիայի դեկտեմբերյան համարի աստղ: Ամսագրի հետ զրույցում նա խոսել է ֆեմինիզմի իր պատկերացնումների, երկակի ստանդարտների ու առանց ռոմանտիկ հարաբերությունների կյանքի ռոմանտիկայի մասին, գրում է spletnik.ru-ն:
Վերջերս քանթրիի աստղն արդեն պատմել էր, որ ինքը միանգամայն երջանիկ է ու կարիք չունի ժամադրությունների, ավելին, դրանք իրեն վախեցնում են:
Cosmo UK-ի հետ զրույցում նա զարգացրել է այդ թեման:
«Ինձ մշտապես փորձում են ինչ-որ մեկի հետ ծանոթացնել: Միակ բանը, որ մնում է՝ նստել ու ասել. «Ես միայնակ չեմ, ես չեմ որոնում հարաբերություններ: Ու ես իսկապես դա զգում եմ, սակայն ինձ պարզապես չեն հասկանում»:
«Ինձ համար ես մի բան եմ պարզել: Անգամ եթե ինչ-որ համակրելի մեկը ցանկանում է քեզ հետ հանդիպել, դա չարժե այն բանին, որ զոհես քո անկախությունը ու բոլորին թույլ տաս քո մասին ասել այն, ինչ խելքներին փչի: Անձամբ ես այդպես այլևս չեմ վարվում»,- ասել է Սվիֆթը:
Իհարկե, դա չի նշանակում, թե Սվիֆթը հերքում է սերն ու ամբողջությամբ բացառում այն, սակայն նա բարձր է գնահատում իր անկախությունը:
«Նույնիսկ չգիտեմ, թե ոնց պետք է ջանամ, որ ներս թողնեմ իմ աշխարհ, իմ ընտանիք մի մարդու, որը կցանկանա ինձ հետ հարաբերություն ունենալ: Այս հարցի լավագույն պատասխանն ինձ համար միայնակ լինելն է: Կյանքը կարող է ռոմանտիկայով լի լինել նաև առանց ռամանտիկ հարաբերությունների: Հենց հիմա ես բացարձակ երջանիկ եմ ու գոհ եմ իմ կյանքից»,- խոստովանել է երգչուհին:
