Բնապահպանության նախարար Արամայիս Գրիգորյանը լրագրողների հետ զրույցում անդրադարձավ հանքարդյունաբերության հետ կապված խնդիներին. «Մեր պետությունը նույնպես զարգանալու հնարավորություններ պետք է ունենա, մենք պետք է կարողանանք աշխատատեղեր ավելացնել նաև այս ոլորտում, մենք չլուծե՞նք այս խնդիրը»,- ասաց նախարարը:
Մեր դիտարկմանը, որ գոյություն ունի պոչամբարների խնդիր, որոնք աղտոտում են միջավայրը և չեն համապատասխանում միջազգային նորմերին, նախարարը նշեց, որ պոչամբարների հետ կապված՝ նախկինում բարձիթողի վիճակ է եղել, հիմա դրա համար նախատեսված գումարներ կան, և առաջիկայում կառավարությունում քննարկում կիրականացնեն, որպեսզի այդ պոչամբարները փակեն, որովհետև այսօր դրանք որևէ մեկի սեփականությունը չեն:
«Մենք միասին կգնանք պոչամբարները դիտելու, և դուք ինքներդ էլ կտեսնեք բացերը, ինչպես են վերանորոգվում, նորմալացվում, և այն խնդիրները, որ այսօր դրված են բնապահպանների առջև, որ անելուց հետո իրենց հետևից մաքրեն, մենք դրա լուծումը պետք է կարողանանք տալ: Առաջիկայում մենք ուզում ենք պիլոտային ծրագիր իրականացնենք պոչամբարների հետ կապված, որովհետև նաև փորձը հնարավորություն կտա մեզ հետագայում արդյունավետ աշխատանքի, դրա համար նախատեսում ենք առաջիկայում երկուսը փակել»,- ասաց նախարարը:
Արամայիս Գրիգորյանից «Առաջին լրատվական»-ը հետաքրքրվեց` արդյոք Մասիսի շրջանում Հովիկ Աբրահամյանին ու նրա մերձավորներին պատկանող ձկնաբուծարաններում եղել են և ինչ են արձանագրել:
Նախարարի խոսքով` անկախ նրանից՝ ում տարածքում ինչ կա, բոլոր տարածքներում բնապահպանության նախարարությունն ուսումնասիրություններ է անցկացրել:
«Փակում ենք այն տարածքներում հորերը, որտեղ ապօրինություններ կան, որտեղ թույլտվություններ չկան, իսկ որտեղ ունեն թույլտվություններ և կարգավորման ռեժիմի պետք է բերվեն, բնականաբար, այդ տարածքներում մենք բերում ենք կարգավորման ռեժիմի: Այնպես որ, ձեր մատնանշած վայրում չկան ապօրինի հորեր, և ևս մեկ անգամ ուզում եմ հստակ լինի, որովհետև լրագրողների մոտ կարող են ինտրիգներ առաջանալ. այդ տարածքներում ապօրինի հորեր չկան»:
Հետաքրքրվեցինք` ուսումնասիրություններն ավարտվե՞լ են նաև Մասիսում՝ Հովիկ Աբրահամյանին և իր եղբայրներին պատկանող ձկնաբուծարաններում, նախարարը նշեց. «Առաջինը հենց մտել են այդ տարածաշրջան, ուղղակի դուք ուշադիր չեք եղել մեր աշխատանքներին, մենք էլ բնականաբար գովազդով չենք զբաղվում, մենք ինքներս կատարում ենք մեր աշխատանքը, ձեր ներկայացրած տարածքում եղել ենք»,- ասաց նախարարը:
Ավելին` տեսանյութում:
