Հոկտեմբերի 26-ին Ուկրաինայում անցկացվեցին Գերագույն Ռադայի արտահերթ ընտրությունները, ինչպես և հայտարարել էր Ուկրաինայի նախագահ Պյոտր Պորոշենկոն: Ընտրություններին մասնակցել է 8 կուսակցություն՝ Պորոշենկոյի հիմնած «Պյոտր Պորոշենկոյի դաշինք»-ը, Օլեգ Լյաշկոյի «Արմատական կուսակցություն»-ը, Յուլյա Տիմոշենկոյի «Բատկիվշինա» կուսակցությունը, «Ազգային ճակատ»-ը՝ հիմնադրված Արսենի Յացենյուկի և Ալեքսանդր Տուրչինովի կողմից: Ավելի վաղ տեղեկացրել էինք, որ և համամասնական, և մեծամասնական ընտրակագրերով առաջադրվել են ազգությամբ հայ թեկնածուներ: Թեև նախնական արդյունքներով, ընտրություններում հաղթել են Ուկրաինայի նախագահի և վարչապետի կուսակցությունները, ազգությամբ հայ թեկնածուների վերաբերյալ տվյալները դեռ ճշտվում են:
«Առաջին լրատվական»-ի հետ զրույցում Ուկրաինայի հայերի միության գործադիր տնօրեն Դավիթ Մկրտչյանը տեղեկացրեց, որ դեռ շարունակում են աշխատանքները պարզելու ուղղությամբ, թե որ հայ թեկնածուներն են աշխատելու Ռադայում: Նրա խոսքով՝ Արսեն Ավակովն ընտրվել է, քանի որ ներկայացված էր «Ազգային ճակատ»-ի 6-րդ համարի ներքո: Ըստ նրա՝ ընդդիմադիր բլոկից ներկայացված էր Վիլեն Շատվորյանը ևս, սակայն տեղեկություններ դեռ չկան՝ ընտրվել է նա, թե ոչ: «Մեծամասնական ընտրակարգով առաջադրված ազգությամբ հայ թեկնածուներ կային, որոնց վերաբերյալ ևս մի քանի օր անց տեղեկություն կունենանք»,- ասաց նա:
Հիշեցնենք, որ ազգությամբ հայ մի քանի քաղաքացիներ առաջադրվել էին մեծամասնական ընտրակարգով, ինչպես՝ Տիգրան Խաչատրյանը «Ուժեղ Ուկրաինա»-ի կողմից, Ժիտոմիրի մարզում առաջադրվել էր անկուսակցական Սուրեն Գևորգյանը, 47-րդ ընտրատարածքում «Բատկիվշինա»-ն էր ներկայացնում Մարտիրոս Գրիգորյանը, 39-րդ ընտրատարածքում՝ Մհեր Կույումջյանը ներկայացնում էր «Բատկիվշինա»-ն: Ւ դեպ, նշենք, որ հայ համայնքներն Ուկրաինայում չէին աջակցել որևէ կուսակցության կամ հայ թեկնածուի՝ փորձելով հեռու մնալ քաղաքականությունից: