Հունահռոմեական ոճի ըմբշամարտի աշխարհի չեմպիոն հռչակված Արսեն Ջուլֆալակյանն այսօր հարազատ ֆակուլտետի հյուրն էր:
ԵՊՀ միջազգային հարաբերությունների ֆակուլտետի ասպիրանտ Արսեն Ջուլֆալակյանն այս անգամ համալսարան էր եկել ոչ թե որպես սովորող, այլ որպես մարզիկ, ում պարզապես շնորհակալություն էին հայտնում հաղթանակով վերադառնալու համար:
«Արսենն առաջին կուրսից աչքի է ընկել իր ուսումնատենչությամբ: Մարզումներն ու մրցումները, ինչ խոսք, դժվարին ու ծանր են եղել, սակայն նա բարեխղճորեն մասնակցել է բոլոր դասերին և քննություններին միշտ պատրաստ ներկայացել: Հիշում եմ՝ Եվրոպայի առաջնությունում հաղթած Արսենը եկավ քննություն հանձնելու, ես ասացի, որ իր ամենամեծ քննությունն արդեն հանձնել է, իսկ նա պնդեց և գերազանց պատասխանեց հարցատոմսի բոլոր հարցերին»,- չեմպիոնի հետ հանդիպման ընթացքում նշեց Միջազգային հարաբերությունների ֆակուլտետի դեկան Գեղամ Պետրոսյանը:
Արսեն Ջուլֆալակյանը մեկ անգամ արդեն հասցրել է ԵՊՀ ոսկե մեդալով պարգևատրվել. դա 2009 թ-նն էր, երբ նա նվաճել էր Եվրոպայի չեմպիոնի կոչումը: Իսկ այս անգամ ԵՊՀ ռեկտոր Արամ Սիմոնյանը նրան հանձնեց հուշամեդալ, որը սովորաբար շնորհվում է ակնառու հաջողությունների հասած անհատներն: Նա ԵՊՀ-ում առաջին սովորողն է, ով ստացավ այդ մեդալը:
«Ես հպարտ եմ որպես ռեկտոր, որպես մանկավարժ, որպես հայ մարդ, որ մենք Արսենի նման երիտասարդ ունենք: Աշխարհում ձևավորված թյուր կարծիք կա, որ հատկապես սպորտի բնագավառում հաջողության հասած մարդիկ բավարարվում են միայն դրանով և իրենց ունակություններն այնքան են ուղղում սպորտին, որ այլևս բան չի մնում ստեղծագործական այլ բարձունքների հասնելու համար: Արսենն այն եզակիներից է, ով գալիս է հերքելու այդ տեսակետը: Նա իր կամքի շնորհիվ է հասել հաջողությունների և՛ կրթության, և՛ սպորտի բնագավառներում՝ ոչ մեկից ոչինչ չխնդրելով»,- նշեց պարոն Սիմոնյանը:
Հանդիպման ընթացքում Արսենի՝ կրթության ոլորտում հասած հաջողությունների մասին խոսեցին նաև նրա դասախոսները: Ի դեպ, այժմ նա գրում է իր թեկնածուական ատենախոսությունը, որը նվիրված է թուրք-սիրիական հարաբերություններին (1991-2001 թթ.): Նրա դասախոսներն էլ հուսով և վստահ են, որ մարզական կարիերան ավարտելուց հետո նա անպայման կանցնի դիվանագիտական աշխատանքի:
«Ուրախ եմ, որ այստեղ ներկա են մարդիկ, որոնց հետ ես անցել եմ իմ ուղին, նրանք այդ ամենի վկան են: Այսօր կրկնակի ուրախ եմ, որ արդեն աշխարհի չեմպիոնի կարգավիճակում եմ պարգև ստանում: Վստահեցնում եմ, որ այս պարգևներն ինձ համար նույնքան կարևոր են, որքան սպորտայինները: Թեպետ դրանք իրարից շատ տարբեր ոլորտներ են, բայց երկուսում էլ հաջողության են հասնում աշխատասիրության և կամքի շնորհիվ»,- շնորհակալություն հայտնելով ստացած պարգևի համար՝ ասաց Արսեն Ջուլֆալակյանը:
Աշխարհի չեմպիոնի համալսարանական հանդիպման ժամանակ նրան ուղեկցում էր նաև ընտանիքը՝ հայրը, մայրը, կինը և եղբայրը: Օլիմպիական չեմպիոն Լևոն Ջուլֆալակյանն ասում է, որ հուզվելու ու ուրախանալու առիթներ շատ է ունեցել, բայց այսօր առանձնակի հպարտություն է զգում, երբ որդուն նրա կատարած աշխատանքի համար գովաբանում են լուրջ մարդիկ:
«Ցանկացած ծնող կարող է իրեն երջանիկ համարել, եթե իր զավակներով հպարտանալու առիթ ունի: Իմ երկու որդիներն էլ ավարտել են մեր պետական համալսարանը: Շնորհակալ եմ դասախոսներին տված գիտելիքների համար, որոնցով նրանք այս դժվար աշխարհում կկարողանան հաջողությունների հասնել»,- հավելեց չեմպիոնի չեմպիոն հայրը:
Նշենք, որ ԵՊՀ հուշամեդալից բացի՝ նա համալսարանից որպես նվեր նաև գրքեր ստացավ: