ՀՀ բնապահպանության նախարարության համակարգը 2014-ի սեպտեմբերի դրությամբ ունի 1325 աշխատող, որոնցից 1213-ը աշխատում են բյուջեից ֆինանսավորվող կազմակերպություններում՝ ամսական միջին աշխատավարձը 173.000 դրամ:
2015-ի պետական բյուջեի նախագծով բնապահպանության նախարարության բյուջետային հատկացումը կազմում է 3 միլիարդ 238 միլիոն 900 հազար դրամ՝ ԱԺ-ում բյուջեի նախագծի քննարկմանը ասաց բնապահպանության նախարար Արամայիս Գրիգորյանը:
ԱԺ պատգամավոր Խոսրով Հարությունյանը հարց բարձրացրեց առ այն, որ անհաշիվ ջրօգտագործման արդյունքում Արարատյան դաշտի ջրերի կտրուկ անկում կա, ի՞նչ քայլեր է պետք անել, որպեսզի մենք կարողանանք ջրային ռեսուրսների բարբարոս օգտագործման դեմն առնել:
Նախարարը նշեց, որ այս հարցը այսօր բոլորին հուզող ամենակարևոր հարցերից մեկն է: «Եղել է ՀՀ նախագահի հստակ հանձնարարական, որ կարճ ժամանակահատվածում կարողանանք փակման, կոնսերվացման, լուծարման ճանապարհով անդրադառնալ խնդրին: Ի՞նչ ենք անում այս հարցի հետ կապված. մինչև հունիս ամիս 223 լիտր վայրկյան ջուր է փակվել: Հունիսից մենք աշխատանքները կրկնապատկել ենք, և այսօր հստակ ներկայացնեմ, որ տարվա կտրվածքով ունենք 358 միլիոն խորանարդ մետր խնայված ջուր:
Բացի դրանից, ՋԹ-ներով տրված թույլտվությունները, որտեղ ժամանակի ընթացքում ջրերը ցամաքել են, դրա ծավալը կազմել է 380 միլիոն խորանարդ մետր: Մենք աշխատանք ենք իրականացնում հիմնականում Մասիսի տարածաշրջանում, քանի որ ձկնաբուծական և ապօրինի հորերի քանակը հիմնականում այս տարածաշրջանում էր ավելի, և 110 հորերի հետ աշխատանք իրականացնելուց մենք այսօր վերականգնել ենք այս թիվը, և վերջին երկու-երեք օրվա ընթացքում ունենք ուրախալի լուրեր, որ այն հորերը որոնք ցամաքել էին, հիմա դրանց մոտ սնկի նման ջուր է դուրս գալիս»,- ասաց նախարարը` հավելելով, որ սրանով ուրախանալ այսօր պետք չէ:
Տարվա կտրվածքով շարունակվելու են հորերի փակման աշխատանքները այնքան ժամանակ, մինչև Արմավիրի տարածաշրջանում նույնպես ունենանք հաջողություններ: Դրանից հետո բոլոր ջրօգտագործողներին կհրավիրենք, և կտրվեն նոր թույլտվություններ. «Պետք է կարողանանք ամբողջությամբ վերահսկել, ես հուսով եմ, որ կարճ ժամանակում այդ արդյունքը կունենանք: Պարզապես մեր բնակչությունն էլ մեզ պետք է աջակցի, հասկանա, որ սա ոչ միայն բնապահպանության նախարարության, ոչ միայն պատգամավորների, այլև սերունդների խնդիրն է»:
