ՀՀ 2015-ի պետբյուջեի նախագծով գյուղատնտեսության նախարարությանը նախատեսված է հատկացնել 10 միլիարդ 25 միլիոն 500 հազար դրամ՝ նախորդ տարվա վեց միլիարդ 974 միլիոն 42 հազար դրամի փոխարեն, այսինքն՝ 3 միլիարդ 52 միլիոն դրամ ավելի: Գումարից 7 միլիարդ 560 միլիոն 700 հազար դրամը ուղղված է բյուջետային ծրագրերին, իսկ վարկային և դրամաշնորհային ծրագրերին նախատեսվում է ուղղել երկու միլիոն 464 միլիոն 800 հազար դրամ: Այս մասին այսօր ԱԺ-ում բյուջեի նախագծի քննարկմանը ասաց գյուղատնտեսության նախարար Սերգո Կարապետյանը:
ԲՀԿ-ական պատգամավոր Վահագն Մախսուդյանը նախարարին հարցրեց՝ երբ մարդիկ քաղաքը թողնեն ու գնան գյուղ, կասեք՝ էս ինչ հարմարավետ պայմաններ են ստեղծվում. ի՞նչ միջոցներով եք գյուղտեխնիկայի նորացում կատարելու, երբ բյուջեում դրա համար հատկացումներ չկան:
Նախարարը նշեց, որ մինչև 2018 թվականը ներառված է գյուղը և գյուղատնտեսությանը համատեղ դիտարկել. «Ճիշտ է, որ առանց զարգացած գյուղի՝ գյուղատնտեսությունը չի կարող զարգանալ: Այդ առումով մենք բավականին խնդիրներ ունենք լուծելու, դրանք տասնյակ տարիներով կուտակվել են, և անհնար է այդ խնդիները լուծել մեկ տարում: Կառավարությունը քայլեր է ձեռնարկում, որ այս խնդիրներն աստիճանաբար լուծվեն:
Գյուղերում ոռոգման խնդիրներ են լուծվում, մշակութային տներ կառուցվում, որոնք կնպաստեն երիտասարդների՝ գյուղում մնալուն, ժամանակի ընթացքում այդ խնդիրները իրենց լուծումները ստանալու են»,- հույս հայտնեց Սերգո Կարապետյանը:
Նախարարի խոսքով՝ անկախացումից հետո մեր երկիր տրակտորներ և կոմբայններ չէին ներկրվել, սակայն վերջին երկու տարիներին մեր երկիր է ներմուծվել է 450 տրակտոր:
«Այս տարի մենք մինչև հունվար հինգ կոմբայն կներկրենք, դրանից կօգտվեն կոոպերատիվ տնտեսությունները, որոնք հնարավորություն ունեն այդ տեխնիկան գնելու»,- ասաց նախարարը:
Հարմարավետ գյուղի մասին զրույցները, ըստ Վահագն Մախսուդյանի՝ ծիծաղելի են, հարկավոր է մեկ անգամ գնալ որևէ համայնք և տեսնել, թե թվերը որքանով են համապատասխանում իրականությանը. այդ ուղղությամբ պետք է աշխատանքները տարվեն, պետք է մտածել՝ մեր այդքան սակավահող Հայաստանում ինչո՞ւ այդքան հողեր չեն մշակվում:
«Այո, մեզ նման սակավահող երկրի համար աններելի է հող չմշակելը: Ես արդեն ասացի, որ երեք տարիների ընթացքում հիսուն հազար լրացուցիչ հող ենք մշակել: Մեզ մնում է մշակել 115 հազար հեկտար հող, բայց որ դուք միայն փուշն եք տեսնում, էն մշակված հողերը չեք տեսնում, դա լավ չի՝ իհարկե: Հողեր ունենք, որ չեն մշակվում, և այնտեղ էլ փուշ պետք է աճի: Մեր առաջնահերթ խնդիրը մեր հիմնական հողային ռեսուրսի արդյունավետ լուծումն է»,- ասաց նախարարը:
