Ամառային տրանսֆերային պատուհանի ժամանակ Մադրիդի «Ատլետիկո»-ն լքեցին այնպիսի ֆուտբոլիստներ, ինչպիսիք են Դիեգո Կոստան, Ֆելիպե Լուիսը, Տիբո Կուրտուան, Ալդերվեյրելդը և Դավիդ Վիլյան: Թիմի գլխավոր մարզիչ Դիեգո Սիմեոնեն իր կարծիքն է հայտնել այդ կապակցությամբ:
«Զարմացած չեմ, որ «Ատլետիկո»-ից հեռանում են, քանի որ թիմը հիանալի ելույթ ունեցավ նախորդ մրցաշրջանում և ֆուտբոլիստների ծառայություններով հետաքրքրվեցին ֆինանսապես ավելի հզոր ակումբներ: Դա բնական է:
Նորմալ է, եթե ֆուտբոլիստը ցանկանում է պրոֆեսիոնալ աճ ունենալ այլ ակումբում: Դա ոչ լավ է, ոչ վատ: Պարզապես, պետք է գնահատել տվյալ ֆուտբոլիստի ելույթները ձեր ակումբում: Բոլորը` սկսած Ռադամել Ֆալկաոյից մինչև Դիեգո Կոստան, Ֆելիպեն իրենց դրսևորել են որպես իսկական տղամարդ և մեծ պրոֆեսիոնալ»,- AS-ը մեջբերում է Սիմեոնեի խոսքերը: