Լեռնային Ղարաբաղի հակամարտության խաղաղ համաձայնագիր պատրաստվում է արդեն 20 տարի և պատրաստվելու է ևս 20 տարի: Այս մասին այսօր «Առաջին լրատվական»-ի հետ զրույցում ասաց «Կովկաս» ինստիտուտի ղեկավար, քաղաքական վերլուծաբան Ալեքսանդր Իսկանդարյանն՝ անդրադառնալով օրերս Փարիզում կայացած Ալիև-Սարգսյան հանդիպման արդյունքներին և մեծ խաղաղության համաձայնագրի վրա աշխատելու մասին հակամարտող կողմերի հանձնառությանը:
Նա նշեց, որ ավելի քան 20 տարի, դեռ ավելին՝ ևս 20 տարի կարելի է խոսել նման պայմանագրի մասին, ցանկացած հանդիպում կարող է որակվել որպես բեկումնային: Սակայն, նրա խոսքով, հարցն այն է, որ նման հանդիպումներից հետո ասվող խոսքերին չպետք է վերաբերվել որպես Աստվածաշնչի, այլ գործիքի՝ որպես շատ անհրաժեշտ, քանի որ քաղաքական գործընթացը գտնվում է կիսամեռած վիճակում, և ռուսների, ապա ամերիկացիների, ապա ֆրանսիացիների միջնորդությամբ հանդիպումները փորձ են գործընթացը վերսկսելու, որպեսզի շարունակվի, որը ճիշտ է, նրա գնահատմամբ:
«Մինսկյան գործընթացն անհրաժեշտ է, և կողմերը պետք է աշխատեն այդ ուղղությամբ, քանի որ դա է ձևաչափը ստատուս քվոյի պահպանման համար, նրանք քաղաքական գործիչներ են, ու նման հայտարարությունները բնական են: Պետք է ասել, որ պատրաստվում է մեծ համաձայնություն, այո, պատրաստվում է, պատրաստվում է արդեն 20 տարի և պատրաստվելու է, իսկ բեկում ակնկալելը ԼՂ հակամարտությունում անլուրջ է»,- ասաց Իսկանդարյանը՝ հավելելով, որ ներկայումս խոսվում է բանակցությունները շարունակելու անհրաժեշտության մասին միջազգայնացված ձևաչափով: Նրա դիտարկումների համաձայն, չկա որևէ նորություն:
Հիշեցնենք, որ օրերս Փարիզի Մարինյի պալատում անցկացվեցին Ֆրանսիայի նախագահ Ֆրանսուա Օլանդի նախաձեռնությամբ հոկտեմբերի 27-ին ԼՂ հիմնահարցի կարգավորմանն ուղղված բանակցությունները: Ֆրանսիայի նախագահի հետ առավոտյան կայացած առանձնազրույցներից հետո Հայաստանի և Ադրբեջանի նախագահները բանակցություններ վարեցին ԵԱՀԿ Մինսկի խմբի համանախագահների և ԵԱՀԿ գործող նախագահի անձնական ներկայացուցիչ Անջեյ Կասպրշիկի մասնակցությամբ, ապա տեղի ունեցավ Սերժ Սարգսյանի և Իլհամ Ալիևի առանձնազրույցը: Բանակցությունների արդյունքներն ուշ երեկոյան ամփոփվեցին նախագահներ Ֆրանսուա Օլանդի, Սերժ Սարգսյանի, Իլհամ Ալիևի և ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ջեյմս Ուորլիքի (ԱՄՆ), Պիեռ Անդիոյի (Ֆրանսիա) և ԵԱՀԿ գործող նախագահի անձնական ներկայացուցիչ Անջեյ Կասպրշիկի համատեղ հանդիպման ժամանակ:
Խաղաղ բանակցություններում առաջընթաց արձանագրելու համար հանդիպման մասնակիցները կարևորել էին ԵԱՀԿ Մինսկի խմբի համանախագահության շրջանակներում երկխոսության շարունակումը և վստահության ամրապնդման ուղղությամբ ջանքերը: Ընդգծվել է հակամարտության խաղաղ կարգավորման այլընտրանքի բացակայությունը: Պայմանավորվածություն է ձեռք բերվել կողմերի միջև շարունակել բարձր մակարդակի բանակցությունները:
