Արմավիրի մարզի ընդհանուր իրավասության դատարանում Վահե Խալաթյանի նախագահությամբ ավարտվել է Մարտին Խ.-ի գործի դատական քննությունը:
25-ամյա Մարտինը մեղադրվում էր տուժողի առողջությանը դիտավորությամբ միջին ծանրության վնաս հասցնելու համար՝ 113 հոդվածի 1-ին մասով:
Տուժողը Մարտինի… մայրն էր:
Ըստ մեղադրանքի՝ 2014 թվականի հունիսի 13-ին, ժամը 23-ն անց 30-ի սահմաններում Մարտինն իրենց տանը կենցաղային հարցերի շուրջ վիճաբանել է իր մոր հետ և բռունցքով հարվածել մոր դեմքի աջ հատվածին՝ պատճառելով դեմքի աջ կեսի տարածուն արյունազեղում, աջ ակնագնդի ցնցում, քթի շրջանի արյունազեղում, առանց տեղախախտի ու քթային շնչառության ֆունկցիայի խանգարման՝ քթոսկրի կոտրվածք, աջ այտոսկրի՝ առանց տեղախախտի կոտրվածք:
Ընդհանուր իրավասության դատարանում նշանակված դատական երկու նիստերին՝ սեպտեմբերի 22-ին և հոկտեմբերի 1-ին,կալանքի տակ չգտնվող Մարտինը չի ներկայացել, նրա նկատմամբ դատարանը ստիպված է եղել հայտարարել հետախուզում:
Հոկտեմբերի 14-ին նա հայտնաբերվել է, իսկ հոկտեմբերի 28-ի նիստում տուժողը՝ Մարտինի կողմից բռնցքահարված մայրը, հայտարարել է, թե հաշտվել է որդու հետ, չի ցանկանում, որ նա քրեական պատասխանատվության ենթարկվի, նյութական որևէ պահանջ նրանից չունի: Միգուցե հարցրել է միայն՝ որդիս, բռունցքդ հո չցավե՞ց…
Ընդհանուր իրավասության դատարանը Մարտին Խ.-ի գործը կարճել է՝ տուժողի հետ նրա հաշտվելու հիմքով:
Մարտինի նկատմամբ քրեական հետապնդումը դադարեցվել է: