38-ամյա գլենդելաբնակ հայազգի կինը, ով եղել է տնային առողջապահական գործակալության համասեփականատեր, մեղադրվել է խարդախ սխեմային մասնակցություն ունենալու մեջ, որը Medicare առողջապահական ծրագրին արժեցել է 22 մլն դոլար: Այս մասին հայտնում է Glendale News Press-ը:
Անժելա Ավետիսյանը, 67-ամյա լոսանջելեսցի բժիշկ Ռոբերտ Գլեյզերը և նրանց հանցակիցները մեղադրվում են Medicare-ից գումարներ «պոկելու» մեջ՝ այն ծառայությունների դիմաց, որոնք եղել են կամ ոչ անհրաժետ, կամ չեն էլ մատուցվել: Ընդհանուր առմամբ նրանք բուժապահովագրության ծրագրին են ներկայացրել 33 մլն դոլարի կեղծ հայտ: 22 միլիոնը վճարվել է 2006-ի հունվարից 2014-ի մայիս ընկած ժամանակահատվածում:
Նշվում է, որ Ավետիսյանը եղել է Fifth Avenue Home Health-ի համասեփականատեր և որպես մենեջեր աշխատել է Գլեյզերի կլինիկայում:
Ավետիսյանի դեմ առաջադրվել է դավադրությանը վերաբերող 1 և առողջապահական խարդախություններին վերաբերող 4 կետից կազմված մեղադրանք: