Սիրիայի հարցով ՄԱԿ-ի գլխավոր քարտուղարի հատուկ ներկայացուցիչ Ստեֆան դե Միստուրան ծրագրում է ստեղծել նոր «բարեկամների խումբ»՝ Սիրիայում հակամարտության կարգավորման համար: TASS-ի հաղորդմամբ՝ այս մասին լրագրողներին հայտնել է ՄԱԿ-ում Ռուսաստանի մշտական ներկայացուցիչ Վիտալի Չուրկինը ՄԱԿ ԱԽ-ում փակ խորհրդակցության արդյունքներով: Նա կողմ է արտահայտվել, որ նոր խմբում ընդգրկվեն Իրանն ու Սաուդյան Արաբիան:
Դիվանագետի խոսքով՝ ՄԱԿ ԱԽ-ում հանդիպման ժամանակ դե Միստուրան ցուցաբերել է «շատ լավ, լուրջ մոտեցում»: «Նա ասաց, որ գլխավոր քարտուղարի «բարեկամների խումբ» կձևավորի»,- հավելել է Չուրկինը:
Չուրկինի կարծիքով՝ նախկինում եղած «բարեկամների խումբը», որը հրավիրվել էր հունվարին շվեյցարական Մոնտրեում Սիրիայի հարցով երկրորդ միջազգային համաժողովին, «չափազանց մեծ է եղել» և չի ներառել առանցքային խաղացողներին՝ Իրանին և Սաուդյան Արաբիային: «Պետք է Սիրիայում իրավիճակի վրա ուղղակի ազդեցություն ունեցող երկրների խումբ: Այն անպայման պետք է ներառի Իրանին և Սաուդյան Արաբիային: Երկու երկրներն էլ, տարբեր պատճառներով, ակտիվորեն ներգրավված չեն եղել նախորդ ջանքերում»,- նշել է Չուրկինը: