Փարիզում համաձայնություն ձեռք բերվեց շարունակել բանակցությունները ԼՂ-ի շուրջ գլոբալ համաձայնության շուրջ: «Առաջին լրատվական»-ի հետ զրույցում այս մասին ասաց Ֆրանսիայի Ռազմավարական հետազոտությունների հիմնադրամի փորձագետ, քաղաքագետ Կայծ Մինասյանը՝ անդրադառնալով Փարիզում կայացած Ալիև-Սարգսյան հանդիպմանը:
Նա նշեց, որ շատ փոքրիկ քայլերով, բայց Լեռնային Ղարաբաղի հակամարտության խաղաղ կարգավորումը մտնում է նոր հանգրվան, որի օրակարգն ու մանրամասները դեռ հստակ չեն: Սակայն, Կայծ Մինասյանի համոզմամբ, մթնոլորտը դրական է, ու ԼՂ հակամարտության շուրջ գլոբալ համաձայնության մասին խոսակցությունները նշանակում են, որ ապակառուցողական շրջանն ավարտված է, նոր շրջան է սկսվում: Միջազգայնագետի բնորոշմամբ՝ կարևոր է, որ Փարիզից երկու կողմերն էլ գոհ են հեռացել:
«Ադրբեջանը չէր ցանկանում ոչ մի համաձայնության գալ, որի հետևանքով սադրանքներ էր կազմակերպում սահմանին, որպեսզի հաներ իր նկատմամբ առկա ճնշումները: Ինչ-որ տեղ այդ ճնշումները հանեց և ուրախ է, որ այդպես եղավ: Հայաստանն ուրախ է, որովհետև բանակցությունները շարունակվում են, պահպանվում է ձևաչափը՝ Մինսկի խումբը և երեք նախագահները:
Ի՞նչ է նշանակում գլոբալ համաձայնություն. այս փուլում սա հստակ չէ, և կարևոր է հասկանալ, թե ինչ ասել է գլոբալ համաձայնություն՝ բանակցություններում ԼՂ մասնակցությո՞ւն, Իրանի և Թուրքիայի դիրքորոշման հետ համաձայնեցո՞ւմ, թե՞ հայ-թուրքական սահմանի ապաշրջափակում: Այսինքն՝ խաղաղության մեծ համաձայնության սկզբունքի համար համաձայնություն տվել են բոլոր կողմերը, որ գլոբալ համաձայնագրի վերաբերյալ բանակցություններ սկսվեն: Բայց թե օրակարգն ինչպիսին պետք է լինի, մասնակիցներն ովքեր են լինելու՝ դեռ պարզ չէ: Պարզ է այն, որ հիմքում լինելու են երեք սկզբունքները՝ տարածքային ամբողջականություն, հակամարտության բացառապես խաղաղ ճանապարհով կարգավորում և ինքնորոշման իրավունք: Այս երեք սկզբունքները պետք է հիմք լինեն այդ մեծ համաձայնության համար, բայց արդյոք Ադրբեջանը կընդունի՞ այդ սկզբունքները, թե՞ շեշտը կդնի առաջին սկզբունքի վրա՝ հստակ չէ»,- մեկնաբանեց Կայծ Մինասյանը:
Հիշեցնենք, որ օրերս Փարիզի Մարինյի պալատում անցկացվեցին Ֆրանսիայի նախագահ Ֆրանսուա Օլանդի նախաձեռնությամբ հոկտեմբերի 27-ին ԼՂ հիմնահարցի կարգավորմանն ուղղված բանակցությունները: Ֆրանսիայի նախագահի հետ առավոտյան կայացած առանձնազրույցներից հետո Հայաստանի և Ադրբեջանի նախագահները բանակցություններ վարեցին ԵԱՀԿ Մինսկի խմբի համանախագահների և ԵԱՀԿ գործող նախագահի անձնական ներկայացուցիչ Անջեյ Կասպրշիկի մասնակցությամբ, ապա տեղի ունեցավ Սերժ Սարգսյանի և Իլհամ Ալիևի առանձնազրույցը: Բանակցությունների արդյունքներն ուշ երեկոյան ամփոփվեցին նախագահներ Ֆրանսուա Օլանդի, Սերժ Սարգսյանի, Իլհամ Ալիևի և ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ջեյմս Ուորլիքի (ԱՄՆ), Պիեռ Անդիոյի (Ֆրանսիա) և ԵԱՀԿ գործող նախագահի անձնական ներկայացուցիչ Անջեյ Կասպրշիկի համատեղ հանդիպման ժամանակ:
Խաղաղ բանակցություններում առաջընթաց արձանագրելու համար հանդիպման մասնակիցները կարևորել էին ԵԱՀԿ Մինսկի խմբի համանախագահության շրջանակներում երկխոսության շարունակումը և վստահության ամրապնդման ուղղությամբ ջանքերը: Ընդգծվել է հակամարտության խաղաղ կարգավորման այլընտրանքի բացակայությունը: Պայմանավորվածություն է ձեռք բերվել կողմերի միջև շարունակել բարձր մակարդակի բանակցությունները:
