Ինչով ասես չի զբաղվում Ջենիֆեր Լոպեսը: Նա երկու երեխաների հոգատար մայր է, դերասանուհի և պրոդյուսեր, FUSE կաբելային հեռուստաալիքի և բջջային հեռախոսների Viva Movil խանութների ցանցի համասեփականատեր, չհաշված նորաձևության և օծանելիքի արտադրության ոլորտում ունեցած հաջողությունները, գրում է elle.ru-ն:
Արդեն շուտով Ջենիֆեր Լոպեսը բոլորովին այլ դերում կներկայանա: Նոյեմբերի 4-ին ԱՄՆ-ում լույս է տեսնում նրա True Love ինքնակենսագրական գիրքը, որտեղ սկսնակ գրողը երկրպագուներին անկեղծորեն պատմում է իր կյանքի, և իհարկե, տղամարդկանց մասին:
Օրինակ, գլուխներից մեկը պատմում է, թե ինչպես է Ջենիֆերը որոշել բաժանվել իր երեխաների հորից՝ Մարկ Էնթոնիից:
Գրքի թողարկումից առաջ լրագրողներին հաջողվել է այդ գլխից մի հատված հայթայթել. «Մենք հենց նոր նշել ենք մեր հարսանիքի 7-րդ տարին: Կողքից թվում է, թե այս ամուսնությունը հեքիաթի է նման: Մարդիկ նույնիսկ չեն էլ կասկածում, որ իրականում մեզ մոտ ամեն ինչ հարթ չէ: Մեր հարաբերությունները տապալվում էին, և դա վախեցնում էր ինձ: Սիրտս կտոր-կտոր էր լինում, երբեմն թվում էր, թե չեմ կարողանում շնչել: Այդ բարդ պահին կողքիս մայրս էր, հենց նա էլ ինձ այդ ժամանակ աջակցեց: Եվ երբ վերջապես ես կարողացա արտաբերել այդ սարսափելի բառերը. «Կարծում եմ, ես ու Մարկը այլևս չենք կարող միասին լինել»,- ես հեկեկացի»:
Ջենիֆերը խոստովանում է, որ True Love-ի սկզբում օրագիր է եղել, որը նա վարել է Dance Again համերգային շրջագայության ողջ ընթացքում և որտեղ արտացոլվել են նրա մեջ հավաքված զգացմունքներն ու անհանգստությունները: Սկզբում նա չի ցանկացել հրապարակել այն, սակայն ժամանակի հետ հասկացել է, որ հնարավոր է, իր պատմությունը օգնի այլ կանանց: Գիրքը կթողարկվի անգլերեն և իսպաներեն լեզուներով: