Թուրքիայում զբոսաշրջությունից եկամուտները 2014 թվականի երրորդ եռամսյակում աճել են 11%-ով՝ հասնելով 12,9 միլիարդ դոլար ռեկորդային ցուցանիշի, հինգշաբթի հաղորդում է Թուրքիայի վիճակագրական գործակալությունը։
«Զբոսաշրջությունը շարունակում է ռեկորդային լինել Թուրքիայում՝ չնայած անկայունությանը հարևան երկրներում»,- հայտարարել է Թուրքիայի մշակույթի և զբոսաշրջության նախարար Օմեր Չելիքը հինգշաբթի տարածված գրավոր հայտարարությունում։
Ըստ թուրքական վիճակագրական գերատեսչության տվյալների՝ եկամուտներն արտասահմանյան զբոսաշրջությունից կազմել են ընդհանուր ցուցանշի 81,8%-ը, իսկ մնացած 18,2%-ը արտասահմանում բնակվող Թուրքիայի քաղաքացիների՝ երկրում տուրիստական շրջագայություններից ստացված եկամուտներն են։ Միջին եկամուտը կազմել է 712 դոլար մեկ արտասահմանցի զբոսաշրջիկից և 936 դոլար՝ արտասահմանում բնակվող թուրք քաղաքացուց։
2013 թ. եկամուտը զբոսաշրջությունից երկրում կազմել է 32 մլրդ դոլար, արտասահմանյան զբոսաշրջիկների թվով Թուրքիան աշխարհում գրավել է վեցերորդ տեղը։ Այս տարվա հունվարից սեպտեմբեր ժամանակահատվածում Թուրքիա են այցելել ավելի քան 30 մլն արտասահմանցի զբոսաշրջիկներ։
