Ֆրանսիական իրավապահ մարմինները հետաքննություն են վարում ինտերնետում հրապարակված կադրերի առնչությամբ, որոնք արվել են բանտերից մեկում։ Լուսանկարներում պատկերված է մի դատապարտյալ, որը պարծենում է ճաղերի հետևում իր արտոնյալ կյանքով։
Սկանդալի կենտրոնում է հայտնվել Gasquinoy բանտը, որը գտնվում է Բեզյե քաղաքում։ Բանտի կալանավորներից մեկը Facebook սոցիալական ցանցում տեղադրել է «Ահա թե ինչ տեսք ունի բանտախուցը» կոչվող տեսահոլավակը, գրում է Midi Libre-ն։
Տեսագրությունում տղամարդը ծխում և ցուցադրում է մարիխուանա և հաբեր։ Կալանավորը դիտողների համար «էքսկուրսիա» է կազմակերպում իր կացարանում։ Մյուս հոլովակը նկարահանված է բանտի բակում, որտեղ հեղինակը ցուցադրում է իր բանտախցի ընկերներին։ Չամաչելով՝ երեք տղամարդիկ ցուցադրում են բջջային հեռախոսներ։ Իսկ դատապարտվածներից մեկը ռեփ է կարդում, հաղորդում է The Local–ը։
Ինտերնետ օգտատերերի մեծամասնությունը, դատելով նրանց մեկնաբանություններից, հիացմունքով են վերաբերվել նման բանտային ժամանցին։ Նրանք գովել են զվարճալի բանտարկյալին ու կարեկցանքով հետաքրքրվել, թե նա երբ է ազատության մեջ հայտնվելու։
Ֆրանսիական մամուլի տվյալներով, Gasquinoy բանտի ղեկավարությունը, փաստորեն, չի վերահսկում կալանավորներին, որոնք ամբողջ օրվա ընթացքում զբոսնում են իրենց խցերի սահմաններից դուրս։ Երբեմն նրանց միջև ծագում են կոնֆլիկտներ ու ծեծկռտուքներ։