Air Armenia ավիաընկերությունը երեկ վերջապես հայտարարել է, որ ժամանակավորապես դադարեցնում է թռիչքները մի շարք ուղղություններով, ինչը տևական ժամանակ է՝ արդեն հաստատված փաստ է:
«Տարածված տեղեկությունների համաձայն՝ ամռան ընթացքում փորձեր եղան ավիաընկերության գործունեությանը խոչընդոտելու ուղղությամբ, որի արդյունքում միտում դիտվեց միակ հայկական ավիափոխադրողի վերացման, ինչը կարող է նպաստավոր պայմաններ ստեղծել օտարերկրյա ավիաընկերությունների համար՝ մենաշնորհային և անկախ քաղաքականություն իրականացնելու և Հայոց երկնքին տնօրինելու ուղղությամբ»,-ասված է հաղորդագրության մեջ:
Նշենք, որ մինչ այս, մենք մի քանի հոդվածներ էինք հրապարակել առ այն, որ ավիաընկերությունը լուրջ ֆինանսական խնդիրներ ունի, հսկայական պարտքեր ունի կուտակած՝ ինչպես «Զվարթնոց» օդանավակայանին, այնպես էլ օդանավերը վարձակալած ընկերությանը: Գրել էինք, որ այդ ֆինանսական խնդիրները հնարավոր է բերեն ավիաընկերության սնանկացման:
Մեր բոլոր հրապարակումներին ավիաընկերությունը սվիններով էր արձագանքում՝ հայտարարելով, որ մեր հրապարակումները ապատեղեկատվություն են, իրենք ոչ մի խնդիր չունեն, ամեն ինչ կարգին է, իսկ չվերթերը չեն հետաձգվում: Դրանից հետո մենք հրապարակեցինք ավիաընկերության չվացուցակը, որից ակնհայտ էր դառնում, որ մի քանի օր շարունակ Air Armenia-ի չվերթերը դեպի Մոսկվա, Աթենք և մի քանի այլ երկրներ չեղյալ են հայտարարվել: Իսկ որպես պատճառ նշել էինք, որ ավիաընկերությունը օդանավ չունի:
Երեկ արդեն Air Armenia-ն ինքն է խոստովանել, որ ներկայումս թռիչքներ է իրականացնում ընդամենը 1 օդանավով, քանի որ մյուս երկու օդանավերը գտնվում են Հոլանդիայում՝ տեխնիկական սպասարկման նպատակով:
«Առաջացած խուճապի և հասարակության շրջանում առկա անորոշությանը զուգահեռ՝ Ա320 տիպի օդանավերի սեփականատերերը պահանջեցին օդանավերից մեկի՝ հերթական տեխնիկական և մյուսի՝ ոչ պլանավորված տեխնիկական սպասարկումը իրականացնել իրենց պատկանող օդանավակայանում՝ իրենց ավելի ապահովագրված զգալու նպատակով»,-հայտարարել է ավիաընկերությունը:
Մինչդեռ մեզ հասած հավաստի տեղեկություններով՝ օդանավերը վերադարձվել էին, քանի որ ավիաընկերությունը չի կարողացել մարել օդանավերի վարձակալության խոշոր գումարը: Ամեն դեպքում Air Armenia ավիաընկերությունը, ի զարմանս շատերի, իր մեջ գտել է եռանդ, ուժ և միջոցներ՝ թռիչքները կազմակերպելու ընդամենը մեկ օդանավով:
Զավեշտալի է, որ ավիաընկերությունն իր սխալ կառավարման կամ այլ պատճառներից առաջացած խնդիրները փորձում է բարդել տեղական, այդ թվում՝ մեր կայքի և ռուսական լրատվամիջոցների վրա՝ իբր թե ԶԼՄ-ների հրապարակումներն են հսկայական կորուստներ պատճառել ընկերությանը:
«Ռոսաերոնավիգացիայի կողմից տարածված հայտարարությունը, մեծ տարածում գտնելով հայաստանյան լրատվամիջոցների շրջանում, պատճառ հանդիսացավ հայկական ավիափոխադրողի հեղինակության անկման, ինչի արդյունքում Air Armenia ավիաընկերությունը սկսեց կրել ֆինանսական մեծ կորուստներ: Հայտարարությունը խուճապ առաջացրեց թե ուղևորների, թե կրեդիտորների և թե դեբիտորների շրջանում: Բազմաթիվ ուղևորներ սկսեցին վերադարձնել արդեն իսկ գնված տոմսերը: Ուղևորների մի մեծ զանգված հրաժարվեց հայկական ուղևորափոխադրողի ծառայություններից: Վաճառքները նվազեցին ավելի քան 60%-ով»,-ասված է հաղորդագրության մեջ և ավելացված, որ ստեղծված իրավիճակում ավիաընկերության ղեկավարությունը որոշում է կայացրել կտրուկ քայլերով իրականացնել կազմակերպության ֆինանսների վերակառուցում, բարեփոխել չվացուցակը մինչև դեկտեմբերի 20-ը՝ շեշտադրում անելով մեծ պահանջարկ ունեցող հիմնական ուղղություններով թռիչքների կազմակերպման վրա:
Ընթացիկ ժամանակահատվածում նախատեսվում է ներգրավել ֆինանսական միջոցներ, կատարել աշխատանքներ Air Armenia-ին պատկանող երկու Ա320 օդանավերը վերադարձնելու ուղղությամբ և դեկտեմբերի 20-ից սկսած իրականացնել բոլոր թռիչքները՝ ըստ նախկինում հայտարարված ձմեռային չվացուցակի:
Air Armenia-ն, սակայն, ֆինանսական և այլ տեսքով պետական աջակցություն չի ստանա: Վերջերս էկոնոմիկայի փոխնախարարն էր ասել, որ ՀՀ կառավարությունը չի պատրաստվում աջակցություն ցուցաբերել ընկերությանը: Ասում են, որ եթե մասնավոր սեկտորից խոշոր ներդրում չարվի, Air Armenia-ն ևս կարժանանա «Արմավիայի» ճակատագրին, այսինքն՝ վերջնականապես սնանկ կհայտարարվի:
